Olympic Khedan Vich Hockey Da Safar

            ਓਲੰਪਿਕ ਖੇਡਾਂ ਵਿੱਚ ਹਾਕੀ ਦਾ ਸਫ਼ਰ
                          ਲੇਖਕ ਰਣਜੀਤ ਸਿੰਘ ਪ੍ਰੀਤ
                      ਪ੍ਰਕਸ਼ਨ ਵਿਸ਼ਵ ਭਾਰਤੀ ਪ੍ਰਕਾਸ਼ਨ
                                    ਪੰਨੇ 152
                                 ਕੀਮਤ ;150
           ਖੇਡ ਲੇਖਣੀ ਦੇ ਖ਼ੇਤਰ ਵਿੱਚ ਰਣਜੀਤ ਸਿੰਘ ਪ੍ਰੀਤ ਇੱਕ ਜਾਣਿਆਂ-ਪਛਾਣਿਆਂ ਨਾਮ ਹੈ । ਜਿਸ ਨੇ ਹੁਣ ਤੱਕ ਕੁੱਲ ਮਿਲਾਕੇ 21 ਕਿਤਾਬਾਂ ਲਿਖੀਆਂ ਹਨ । ਓਲੰਪਿਕ ਖੇਡਾਂ ਵਿੱਚ ਭਾਰਤੀ ਹਾਕੀ ਦਾ ਸਫ਼ਰ ਇਹਨਾਂ ਦੀ 22 ਵੀਂ ਕਿਤਾਬ ਹੈ । ਕੋਈ ਅਜਿਹਾ ਮਿਆਰੀ ਅਖ਼ਬਾਰ/ਮੈਗਜ਼ੀਨ ਨਹੀਂ ਜਿਸ ਵਿੱਚ ਸ਼੍ਰੀ ਪ੍ਰੀਤ ਨਾ ਛਪਿਆ ਹੋਵੇ । ਇੱਕ ਗਜ਼ਟਿਡ ਅਫ਼ਸਰ ਦੇ ਅਹੁਦੇ ਤੋਂ ਸੇਵਾ ਮੁਕਤ ਹੋਣ ਮਗਰੋਂ ਉਹਨਾਂ ਨੇ ਕਲਮ ਨੂੰ ਮਜ਼ਬੂਤੀ ਨਾਲ ਹੱਥ ਪਾਇਆ ਹੀ ਸੀ ਕਿ ਉਹਨਾਂ ਦੀ ਪਤੱਨੀ ਬਿੰਦਰਜੀਤ ਕੌਰ ਪ੍ਰੀਤ “ਪ੍ਰੀਤ ਆਲ੍ਹਣੇ ” ਨੂੰ ਵਰਾਨ ਕਰਕੇ ਸਦਾ ਲਈ ਇਸ ਦੁਨੀਆਂ ਤੋਂ ਤੁਰ ਗਈ । ਪਰ ਉਹਨਾਂ ਕੁੱਝ ਦੇਰ ਸੰਜੀਦਾ ਰਹਿਣ ਮਗਰੋਂ ਕਲਮ ਨੂੰ ਫਿਰ ਸਾਥੀ ਬਣਾ ਲਿਆ ਹੈ । ਓਲੰਪਿਕ ਹਾਕੀ ਬਾਰੇ ਉਹਨਾਂ ਦੀ ਇਹ ਕਿਤਾਬ ਬਹੁਤ ਜਾਣਕਾਰੀ ਦੇਣ ਵਾਲੀ ਹੈ । ਜਦੋਂ ਤੋਂ ਹਾਕੀ ਖੇਡੀ ਜਾਣੀ ਸ਼ੁਰੂ ਹੋਈ,ਗੱਲ ਉੱਥੋਂ ਸ਼ੁਰੂ ਕਰਕੇ ਹਰੇਕ ਓਲੰਪਿਕ ਵਿੱਚ ਖੇਡੀ ਗਈ ਹਾਕੀ ਦੇ ਹਰੇਕ ਮੈਚ ਦੇ ਪੂਰੇ ਵੇਰਵੇ ਦਰਸਾਏ ਗਏ ਹਨ । ਸ਼ਾਇਦ ਹਾਕੀ ਦੇ ਖੇਤਰ ਦੀ ਇਹ ਅਜਿਹੀ ਪਹਿਲੀ ਕਿਤਾਬ ਹੈ । ਜਿਸ ਵਿੱਚ ਐਨਾ ਕੁੱਝ ਸਮੋਇਆ ਹੋਇਆ ਹੈ। ਅੰਕੜਿਆਂ ਸਹਿਤ ਭਾਰਤੀ ਟੀਮ ਦੀ ਸਥਿੱਤੀ ਨੂੰ ਵੀ ਦੂਜੀਆਂ ਟੀਮਾਂ ਵਾਂਗ ਹੀ ਸੰਭਾਲਿਆ ਹੈ । ਹਾਕੀ ਦੀਆਂ ਵੰਨਗੀਆਂ,ਜਿੱਤਾਂ-ਹਾਰਾਂ ਅਤੇ ਵਿਸ਼ਵ ਦੀ ਹਾਕੀ ਵਿੱਚ ਸਰਦਾਰਾਂ ਦੀ ਸਰਦਾਰੀ,ਭਰਾਵਾਂ,ਪਰਿਵਾਰ ਮੈਂਬਰਾਂ ਆਦਿ ਬਾਰੇ ਵੀ ਪੂਰੇ ਵੇਰਵੇ ਦਰਜ ਹਨ । ਗੋਲ ਕਰਨ ਵਾਲੇ ਖਿਡਾਰੀ,2020 ਤੱਕ ਦੀਆਂ ਮੇਜ਼ਬਾਨੀਆਂ,ਯਾਦਗਾਰੀ ਤਸਵੀਰਾਂ ਵੀ ਇਸ ਵਿੱਚ ਸ਼ਾਮਲ ਹਨ । ਕੁੱਲ ਮਿਲਾਕੇ ਇਹ ਕਿਤਾਬ ਪੜ੍ਹਨਯੋਗ ਅਤੇ ਅਹਿਮ ਦਸਤਾਵੇਜ ਵਜੋਂ ਸੰਭਾਲਣ ਯੋਗ ਹੈ । ਓਲੰਪਿਕ ਖੇਡਾਂ ਮੌਕੇ ਛਪੀ ਇਸ ਕਿਤਾਬ ਦੀ ਅਹਿਮੀਅਤ ਹੋਰ ਵੀ ਨਿਖ਼ਰੀ ਹੈ । ਕਿਤਾਬ ਦੀ ਤਿਆਰੀ ਲਈ ਕੀਤੀ ਮਿਹਨਤ ਪਾਠਕਾਂ ਦਾ ਭਰਵਾਂ ਹੁੰਗਾਰਾ ਮੰਗਣ ਦਾ ਹੱਕ ਰਖਦੀ ਹੈ ।
      ਜਗਰੂਪ ਸਿੰਘ ਜਰਖ਼ੜ

ਅੱਜ ਹੋਵੇਗਾ ਓਲੰਪਿਕ ਖੇਡਾਂ ਦਾ ਲਾ-ਜਵਾਬ ਹੋਵੇਗਾ

         ਅੱਜ ਹੋਵੇਗਾ ਓਲੰਪਿਕ ਖੇਡਾਂ ਦਾ ਲਾ-ਜਵਾਬ ਹੋਵੇਗਾ
                               ਰਣਜੀਤ ਸਿੰਘ ਪ੍ਰੀਤ
                        ਵਿਸ਼ਵ ਭਰ ਦੇ ਮੁਲਕਾਂ ਦੀਆਂ ਭਲਕੇ 27 ਜੁਲਾਈ ਨੂੰ ਲੰਦਨ ਵਿੱਚ ਹੋਣ ਵਾਲੇ ਓਲੰਪਿਕ ਉਦਘਾਟਨੀ ਸਮਾਰੋਹ ਉੱਤੇ ਨਿਗਾਹਾਂ ਲੱਗੀਆਂ ਹੋਈਆਂ ਹਨ । ਇਸ ਵਾਰੀ ਵਿਸ਼ੇਸ਼ ਗੱਲ ਇਹ ਵੀ ਹੈ ਕਿ 1908,ਅਤੇ 1948 ਤੋਂ ਬਾਅਦ ਤੀਜੀ ਵਾਰੀ 30 ਵੀਆਂ ਖੇਡਾਂ ਦੀ ਮੇਜ਼ਬਾਨੀ ਕਰਨ ਵਾਲੇ ਬਰਤਾਨੀਆਂ ਦੀਆਂ ਇਹ ਵੀ ਕੋਸ਼ਿਸ਼ਾਂ ਹਨ ਕਿ ਪਿਛਲੇ 2008 ਵਾਲੇ ਯਾਦਗਾਰੀ ਉਦਘਾਟਨ ਸਮਾਰੋਹ ਨੂੰ ਫਿੱਕਾ ਦਰਸਾਇਆ ਜਾ ਸਕੇ । ਉਦੋਂ ਓਲੰਪਿਕ ਮਿਸ਼ਾਲ ਨੂੰ ਲੈ ਕੇ ਵਾ-ਵੇਲਾ ਚੱਲਿਆ ਸੀ ਅਤੇ ਇਸ ਵਾਰੀ ਵੀ ਝਪਟ ਮਾਰ ਵਰਗੀਆਂ ਘਟਨਾਵਾਂ ਵਾਪਰੀਆਂ ਹਨ । ਓਲੰਪਿਕ ਮਿਸ਼ਾਲ ਕੌਣ ਜਲਾਏਗਾ ? ਇਸ ਬਾਰੇ ਕਈ ਕਿਆਸਅਰਾਈਆਂ ਹਨ । ਸੈਂਤੀ ਵਰ੍ਹਿਆਂ ਦੇ ਫੁਟਬਾਲ ਕਪਤਾਨ ਡੇਵਿਡ ਬੈਖਮ ਜਿਸ ਨੇ ਲੰਦਨ ਨੂੰ ਮੇਜ਼ਬਾਨੀ ਦਿਵਾਉਣ ਸਮੇ ਜ਼ੋਰਦਾਰ ਭੂਮਿਕਾ ਨਿਭਾਈ ਸੀ,ਵੱਲ ਵੀ ਇਸ਼ਾਰਾ ਕੀਤਾ ਜਾ ਰਿਹਾ ਹੈ । ਮੁਹੰਮਦ ਅਲੀ ਦੀ ਆਮਦ ਵੀ ਖਿੱਚ ਦਾ ਕੇਂਦਰ ਬਣੇਗੀ ।
         27 ਜੁਲਾਈ ਤੋਂ 12 ਅਗਸਤ ਤੱਕ ਹੋਣ ਵਾਲੀਆਂ ਇਹਨਾਂ ਖੇਡਾਂ ਦੇ ਉਦਘਾਟਨ,ਸਮਾਪਤੀ ਸਮਾਰੋਹ,ਅਥਲੈਟਿਕਸ ਵਰਗੇ ਮੁਕਾਬਲਿਆਂ ਲਈ ਓਲੰਪਿਕ ਪਾਰਕ ਦੇ ਦੱਖਣੀ ਖੇਤਰ ਵਿੱਚ ਸਥਿੱਤ 80 ਹਜ਼ਾਰ ਸੀਟਾਂ ਵਾਲੇ  ਓਲੰਪਿਕ ਸਟੇਡੀਅਮ ਨੂੰ ਚੁਣਿਆਂ ਗਿਆ ਹੈ । ਇਸ ਦੀ ਬਣਤਰ ਲਈ 10 ਹਜ਼ਾਰ ਟਨ ਲੋਹੇ ਦੀ ਵਰਤੋਂ ਕੀਤੀ ਗਈ ਹੈ । ਜਿੱਥੇ ਉਦਘਾਟਨ ਸਮਾਰੋਹ ਲਈ ਸਾਰੀ ਜ਼ਿਮੇਵਾਰੀ ਨਾਮਵਰ ਆਰਟਿਸਟ ਡਾਇਰੈਕਟਰ ਫ਼ਿਲਮਸਾਜ਼ ਡੈਨੀ ਬੋਇਲ ਨੂੰ ਸੌਂਪੀ ਗਈ ਹੈ । ਉੱਥੇ ਮੁੱਖ ਪ੍ਰਦਰਸ਼ਨ ਮੌਕੇ 15000 ਕਲਾਕਾਰ ਕਲਾ ਦੇ ਜ਼ੌਹਰ ਵੀ ਦਿਖਾਉਣਗੇ । ਇਹਨਾਂ ਵਿੱਚ 1650 ਸਕੂਲੀ ਬੱਚੇ ਵੀ ਪੂਰਬੀ ਲੰਦਨ ਤੋਂ ਭਾਗ ਲੈ ਰਹੇ ਹਨ । ਕਲਾਕਾਰਾਂ ਲਈ ਪ੍ਰੋਗਰਾਮ ਦੌਰਾਂਨ 25000 ਕਿਸਮ ਦਾ ਪਹਿਰਾਵਾ ਵੀ ਬਦਲ ਬਦਲ ਕੇ ਪਹਿਨਣ ਦਾ ਬੰਦੋਬਸਤ ਕੀਤਾ ਗਿਆ ਹੈ । ਖੇਡ ਖਰਚਿਆਂ ਦਾ ਬੱਜਟ 27 ਮਿਲੀਅਨ ਮਿਥਿਆ ਗਿਆ ਹੈ । ਉਦਘਾਟਨ ਰਸਮ ਰਾਹੀਂ ਬਰਤਾਨਵੀ ਸੰਸਕ੍ਰਿਤੀ,ਸਭਿਅਤਾ ਅਤੇ ਹੋਰਨਾਂ ਵਿਸ਼ੇਸ਼ ਪੱਖਾਂ ਨੂੰ ਪੂਰੀ ਦੁਨੀਆਂ ਤੱਕ ਪਹੁੰਚਾਉਣਾ ਹੈ । ਬਰਤਾਨੀਆਂ ਦੇ ਪਿੰਡਾਂ ਵਿਚਲੀ ਹਾਲਤ ਬਾਰੇ ਝਾਕੀਆਂ,ਫਿਰ ਬਰਤਾਨੀਆਂ ਦੀ ਪ੍ਰਗਤੀ ਦੀ ਕਹਾਣੀ,ਅਤੇ ਤੀਜੇ ਭਾਗ ਵਿੱਚ ਵਿਸ਼ਵ ਜੰਗਾਂ ਨਾਲ ਸਬੰਧਤ ਕੁੱਝ ਦ੍ਰਿਸ਼ ਸ਼ਾਮਲ ਹਨ । ਬਰਤਾਨੀਆਂ ਦੇ 12000 ਨਾਚੇ ਵੀ ਢੌਲ ਨਾਲ ਨਾਚ ਪੇਸ਼ ਕਰਨਗੇ । ਕੌਮਾਂਤਰੀ ਓਲੰਪਿਕ ਕਮੇਟੀ ਨੇ ਵੀ ਸਾਰੇ ਪ੍ਰਬੰਧਾਂ ਉੱਤੇ ਨਜ਼ਰਸਾਨੀ ਕੀਤੀ ਹੈ । ਸ਼ਾਮ ਨੂੰ 9 ਵਜੇ ਬ੍ਰਿਟਿਸ਼ ਸਮਰ ਟਾਈਮ (ਬੀ ਐਸ ਟੀ) ਸ਼ੁਰੂ ਹੋਣ ਵਾਲੇ ਕਰੀਬ 3 ਘੰਟਿਆਂ ਦੇ ਸਮਾਰੋਹ ਨੂੰ “ ਇਸਲੇੱਸ ਵੰਡਰ “ ਦਾ ਨਾਅ ਦਿੱਤਾ ਗਿਆ ਹੈ । ਜਿਸ ਨੂੰ ਦੁਨੀਆਂ ਭਰ ਵਿੱਚ ਇਲਾਕਟ੍ਰੌਨਿਕਸ ਮੀਡੀਏ ਰਾਹੀਂ ਕਰੀਬ 4 ਬਿਲੀਅਨ ਲੋਕ ਨਾਲੋ ਨਾਲ ਵੇਖ ਰਹੇ ਹੋਣਗੇ । ਉਦਘਾਟਨ ਦੀ ਸ਼ੁਰੂਆਤ ਯੂਰਪ ਦੀ ਸੱਭ ਤੋਂ ਵੱਡੀ 27 ਟਨ ਭਾਰੀ ਅਤੇ ਸਦੀਆਂ ਪੁਰਾਣੀ ਘੰਟੀ ਉੱਤੇ ਚੋਟ ਵੱਜਣ ਨਾਲ ਹੋਵੇਗੀ । ਇੱਕ ਮੌਕਾ ਅਜਿਹਾ ਆਵੇਗਾ ਜਦ ਸਟੇਡੀਅਮ ਹਰੇ ਭਰੇ ਖੇਤ-ਖਲਿਆਨੋ ਵਿੱਚ ਬਦਲ ਜਾਵੇਗਾ ਅਤੇ ਜਾਨਵਰ ਮਸਤੀ ‘ਚ ਦਿਖਾਈ ਦੇਣਗੇ । ਇਸ ਵਾਸਤੇ ਭੇਡਾਂ ,ਗਊਆਂ ਆਦਿ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ ।  
                              ਟਿਕਟਾਂ ਦੇ 300 ਗੁਣਾ ਵੱਧ ਕੀਮਤ ਨਾਲ ਬਲੈਕ ਵਿੱਚ ਵਿਕਣ ਤੋਂ ਇਲਾਵਾ ਜੋ ਉਦਘਾਟਨ ਸਮਾਰੋਹ ਦੀ ਰੀਹਰਸਲ ਕਰੀਬ 62000 ਦਰਸ਼ਕਾਂ ਨੂੰ ਦਿਖਾਈ ਗਈ ਹੈ,ਉਸ ਬਾਰੇ ਵੀ ਇਹ ਸਹੁੰ ਚੁਕਾਈ ਗਈ ਕਿ ਇਹਦਾ ਹੋਰ ਕਿਤੇ ਕੋਈ ਪ੍ਰਚਾਰ  ਨਹੀਂ ਕਰਨਾ ਹੈ । ਪਰ ਫਿਰ ਵੀ ਵੇਰਵੇ ਛਣ ਛਣ ਕੇ ਬਾਹਰ ਆ ਰਹੇ ਹਨ । ਉਧਰ ਬਰਤਾਨੀਆਂ ਨੇ 1200 ਹੋਰ ਵਧੀਕ ਸੁਰਖਿਆ ਕਰਮੀ ਨਿਯਕਤ ਕਰਨ ਦੇ ਨਾਲ ਇਹ ਵੀ ਕਿਹਾ ਸੀ ਕਿ ਆਰਮੀ ਵਰਦੀ ਦੀ ਥਾਂ ਟਰੈਕ ਸੂਟਾਂ ਦੀ ਵਰਤੋਂ ਕੀਤੀ ਜਾਵੇ,ਪਰ ਸੈਨਿਕਾਂ ਨੇ ਅਤੇ ਪ੍ਰਬੰਧਕ ਕਮੇਟੀ ਨੇ ਅਜਿਹਾ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ । ਉਂਜ ਹੁਣ ਕੁੱਲ ਸੁਰਖਿਆ ਕਰਮੀਆਂ ਦੀ ਗਿਣਤੀ 18200 ਹੋ ਗਈ ਹੈ ।
                        ਲੰਦਨ ਵਿੱਚ ਇਹ ਵੀ ਰਿਕਾਰਡ ਬਣੇਗਾ ਕਿ 120 ਦੇਸ਼ਾਂ ਦੇ ਰਾਸ਼ਟਰਪਤੀ,ਪ੍ਰਧਾਂਨ ਮੰਤਰੀ ਹਾਜ਼ਰੀ ਭਰਨਗੇ । ਅਮਰਿਕਾ ਦੀ ਮਿਸ਼ੇਲ ਓਬਾਮਾ ਨੇ ਵੀ ਪਹੁੰਚਣਾ ਹੈ । ਭਾਵੇਂ ਉਸਦਾ ਇਸ ਪਹੁੰਚ ਪਿੱਛੇ ਮੰਤਵ ਕੋਈ ਵੀ ਹੋਵੇ । ਮੁਖ ਸਥਾਨ ਉੱਤੇ ਹੋਰਨਾ ਤੋਂ ਇਲਾਵਾ ਮਹਾਰਾਣੀ ਜੈੱਕ ਰੌਗੇ ਵੀ ਮਹਿਮਾਨਾਂ ਦੇ ਸੁਆਗਤ ਲਈ ਹਾਜ਼ਰ ਹੋਵੇਗੀ । ਮਾਰਚ ਪਾਸਟ ਸਮੇ ਟੀਮਾਂ ਮੇਜ਼ਬਾਨ ਮੁਲਕ ਦੀ ਭਾਸ਼ਾ ਅਨੁਸਾਰ ਅਲਫ਼ਾਬੈਟੀਕਲੀ ਪ੍ਰਵੇਸ਼ ਕਰਨਗੀਆਂ । ਪਰ ਯੂਨਾਨ ਦੀ ਟੀਮ ਸੱਭ ਤੋਂ ਮੁਹਰੇ ਅਤੇ ਮੇਜ਼ਬਾਨ ਬਰਤਾਨੀਆਂ ਦੀ ਟੀਮ ਸਭ ਤੋਂ ਪਿੱਛੇ ਹੋਵੇਗੀ । ਕੁੱਲ 205 ਮੁਲਕਾਂ ਦੀਆਂ ਟੀਮਾਂ ਸ਼ਿਰਕਤ ਕਰ ਰਹੀਆਂ ਹਨ । ਓਲੰਪਿਕ ਮਿਸ਼ਾਲ,ਓਲੰਪਿਕ ਝੰਡਾ,ਓਲੰਪਿਕ ਸਹੁੰ ਵਾਲੀਆਂ ਰਸਮਾ ਦੇ ਨਾਲ ਹੀ ਬਰਤਾਨੀਆਂ ਦੀ ਮਹਾਰਾਣੀ ਐਲਜਾਬੈੱਥ ਖੇਡਾਂ ਸ਼ੁਰੂ ਕਰਨ ਦਾ ਇਤਿਹਾਸਕ ਐਲਾਨ ਕਰੇਗੀ ।  ਕੁੱਝ ਹੈਰਤ-ਅੰਗੇਜ਼ ਦ੍ਰਿਸ਼ ਵੀ ਹਨ । ਛਤਰੀਆਂ ਦਾ ਖੁੱਲ੍ਹਣਾ,ਬੱਚਿਆ ਦਾ ਬਿਸਤਰ ਸਮੇਤ ਨਾਚ ਅਤੇ ਹੋਰ ਵੀ ਕਈ ਹੈਰਾਨਕੁਨ ਝਾਕੀਆਂ ।॥
ਰਣਜੀਤ ਸਿੰਘ ਪ੍ਰੀਤ
ਭਗਤਾ ਭਠਿੰਡਾ) 

ਪਹਿਲੇ ਐਕਸ਼ਨ ਹੀਰੋ; ਅਤੇ ਭਲਵਾਨੀ ਦਾ ਸੁਮੇਲ;ਦਾਰਾ ਸਿੰਘ

           ਪਹਿਲੇ ਐਕਸ਼ਨ ਹੀਰੋ; ਅਤੇ ਭਲਵਾਨੀ ਦਾ ਸੁਮੇਲ;ਦਾਰਾ ਸਿੰਘ
                                                       ਰਣਜੀਤ ਸਿੰਘ ਪ੍ਰੀਤ      

                         ਰੈਸਲਰ ਅਤੇ ਫਿਲਮੀ ਐਕਟਰ ਦਾਰਾ ਸਿੰਘ ਜਿਸਨੂੰ ਮੁੰਬਈ ਦੇ ਕੋਕਿਲਾਬੇਨ ਹਸਪਤਾਲ ਵਿੱਚ 7 ਜੁਲਾਈ ਸਨਿਚਰਵਾਰ ਨੂੰ ਦਾਖਲ ਕਰਵਾਇਆ ਗਿਆ ਸੀ ਅਤੇ ਲਾ-ਇਲਾਜ ਹਾਲਤ ਵੇਖਦਿਆਂ ਬੁੱਧਵਾਰ ਸ਼ਾਮ ਨੂੰ ਹੀ ਘਰ ਭੇਜ ਦਿੱਤਾ ਗਿਆ ਸੀ। ਜਿੱਥੇ ਉਹਨਾ ਨੇ ਅੱਜ ਵੀਰਵਾਰ ਦੀ ਸਵੇਰ ਨੂੰ 7.30 ਵਜੇ ਆਖ਼ਰੀ ਸਾਹ ਲਿਆ । ਇਹ ਦੁਖਿਦ ਖ਼ਬਰ ਨਾਲ ਦੇਸ਼ ਵਿਦੇਸ਼ ਦੇ ਖੇਡ ਪ੍ਰੇਮੀਆਂ,ਫ਼ਿਲਮੀ ਸਨਅਤ ਵਿੱਚ ਸ਼ੋਕ ਦੀ ਲਹਿਰ ਫ਼ੈਲ ਗਈ,ਖ਼ਾਸ਼ਕਰ ਪੰਜਾਬ ਵਿੱਚ ਬਹੁਤ ਹੀ ਗ਼ਮਗੀਨ ਮਹੌਲ ਬਣ ਗਿਆ । ਠੰਡੇ ਪਏ ਫ਼ੌਲਾਦੀ ਜਿਸਮ ਨੂੰ ਅੱਜ ਬਾਅਦ ਦੁਪਹਿਰ ਸਪੁਰਦ-ਇ-ਆਤਸ਼ ਕੀਤਾ ਗਿਆ । ਡਾਕਟਰਾਂ ਅਨੁਸਾਰ ਹਸਪਤਾਲ ਦਾਖ਼ਲ ਕਰਵਾਉਂਣ ਸਮੇ 84 ਸਾਲਾਂ ਦੇ ਦਾਰਾ ਸਿੰਘ ਦਾ  ਬਲੱਡ ਪ੍ਰੈਸਰ ਕਾਫੀ ਘੱਟ ਸੀ ,ਅਤੇ ਉਹਨਾਂ ਦੇ ਦਿਮਾਗ ਦੀ ਨਾੜੀ ਵਿੱਚ ਖੂਨ ਦਾ ਕਲਾਟ ਰੁਕਿਆ ਹੋਇਆ ਸੀ । ਉਹਨਾਂ ਦੀ ਨਬਜ਼ ਵੀ ਰੁਕੀ ਹੋਈ ਸੀ। ਇਹ ਵੀ ਕਿਹਾ ਜਾ ਰਿਹਾ ਸੀ ਕਿ ਉਹਨਾਂ ਨੂੰ ਦਿਲ ਦਾ ਦੌਰਾ ਪਿਆ ਹੈ । ਗੁਰਦੇ ਫੇਲ੍ਹ ਹੋਣ ਦੀ ਵਜ੍ਹਾ ਕਰਕੇ ਡਾਇਲਸਿਸ ਦੀ ਵੀ ਵਰਤੋਂ ਕਰਨੀ ਪੈ ਰਹੀ ਸੀ । ਰੋਬੋਟ ਵਰਗੇ ਸ਼ਕਤੀਸ਼ਾਲੀ ਦਾਰਾ ਸਿੰਘ ਨੂੰ ਆਈ ਸੀ ਯੂ ਵਿੱਚ ਵੈਟੀਲੇਟਰ ਉੱਤੇ ਮਸੀਨਾਂ ਸਹਾਰੇ ਜਿਉਂਦਾ ਰੱਖਣ ਦੇ ਉਪਰਾਲੇ ਕੀਤੇ ਜਾ ਰਹੇ ਸਨ । ਗਿਆਰਾਂ ਜੁਲਾਈ ਨੂੰ 3.37 ਵਜੇ ਡਾਕਟਰਾਂ ਨੇ ਮੀਡੀਏ ਨੂੰ ਦੱਸਿਆ ਕਿ ਦਾਰਾ ਜੀ ਦਾ ਦਿਮਾਗ ਨਕਾਰਾ ਹੋ ਚੁੱਕਿਆ ਹੈ ਅਤੇ ਰਿਕਵਰੀ ਦੀ ਸੰਭਾਵਨਾ ਵੀ ਖ਼ਤਮ ਹੋ ਗਈ ਸੀ।
                    ਕਿੰਗਕਾਂਗ ਅਤੇ ਫੌਲਾਦ ਵਰਗੇ ਨਾਵਾਂ ਦੀਆਂ ਫ਼ਿਲਮਾਂ ਦੇ ਐਕਟਰ ਦਾਰਾ ਸਿੰਘ ਦਾ ਜਨਮ 19 ਨਵੰਬਰ 1928 ਨੂੰ ਧਰਮੂਚੌਕ (ਅੰਮ੍ਰਿਤਸਰ) ਵਿਖੇ ਸੂਰਤ ਸਿੰਘ ਰੰਧਾਵਾ ਅਤੇ ਬਲਵੰਤ ਕੌਰ ਦੇ ਘਰ ਹੋਇਆ । ਲਾਡਲੇ ਨਾਂ ਦਾਰਾ ਨਾਲ ਪੁਕਾਰੇ ਜਾਣ ਵਾਲੇ ਇਸ ਰੈਸਲਰ ਅਤੇ ਐਕਟਰ ਦਾ ਪੂਰਾ ਨਾਅ ਦਾਰਾ ਸਿੰਘ ਰੰਧਾਵਾ ਸੀ । ਇਸ 6 ਫੁੱਟ 2 ਇੰਚ ਕੱਦ ਵਾਲੇ ਦਾਰੇ ਦਾ ਦੂਜਾ ਵਿਆਹ 11 ਮਈ 1961 ਨੂੰ ਸੁਰਜੀਤ ਕੌਰ ਨਾਲ ਹੋਇਆ । ਉਹ 1962 ਤੋਂ 2007 ਤੱਕ ਜਿੰਦਗੀ ਦੇ ਬਹੁਤ ਸਾਰੇ ਖੇਤਰਾਂ ਵਿੱਚ ਸਰਗਰਮ ਰਿਹਾ । ਫ਼ਿਲਮੀ ਦੁਨੀਆਂ ਵਿੱਚ 1952 ਨੂੰ ਫ਼ਿਲਮ ਸੰਗਦਿਲ ਨਾਲ ਪੈਰ ਰੱਖਿਆ । ਦਾਰਾ ਸਿੰਘ ਨੇ ਆਪਣੀ ਜ਼ਿੰਦਗੀ ਦਾ ਆਖਰੀ ਰੋਲ ਇਮਤਿਆਜ ਅਲੀ ਦੀ ਫਿਲਮ ਜਬ ਵੁਈ ਮੈੱਟ (2007) ਵਿੱਚ ਕਰੀਨਾ ਕਪੂਰ ਦੇ ਦਾਦਾ ਵਜੋਂ ਨਿਭਾਇਆ । ਉਸ ਨੇ ਵਤਨ ਸੇ ਦੂਰ,ਦਾਦਾ,ਰੁਸਤਮ-ਇ-ਬਗਦਾਦ,ਸਿਕੰਦਰ-ਇ-ਆਜ਼ਮ,ਰਾਕਾ,ਮੇਰਾ ਨਾਅ ਜੌਕਰ,ਧਰਮ-ਕਰਮ,ਮਰਦ, ਸੰਗਦਿਲ (1952), ਸੇਰ ਦਿਲ (1965),ਤੂਫਾਨ (1969),ਦੁਲਹਨ ਹਮ ਲੇ ਜਾਏਂਗੇ (2000) ਵਿੱਚ ਜਬਰਦਸਤ ਭੂਮਿਕਾ ਨਿਭਾਈ । ਕਈ ਪੰਜਾਬੀ ਫਿਲਮਾਂ ਵਿੱਚ ਵੀ ਰੋਲ ਨਿਭਾਏ । ਅੱਠ ਫ਼ਿਲਮਾਂ ਦਾ ਨਿਰਮਾਣ ਵੀ ਕਰਿਆ।

 ਛੋਟੀ ਉਮਰ ਵਿੱਚ ਹੀ  ਉਸ ਦੀ ਡੀਲ ਡੌਲ ਵੇਖ ਕੇ ਨਿਆਣੇ-ਸਿਆਣੇ ਉਸ ਨੂੰ ਭਲਵਾਨ ਆਖਣ ਲੱਗ ਪਏੇ ਸਨ । ਜਿਸ ਨਾਲ ਉਸ ਨੂੰ ਹੌਂਸਲਾ ਮਿਲਿਆ ਅਤੇ ਉਹ ਅਖਾੜਾ ਬਣਾ ਕੇ ਅਭਿਆਸ ਕਰਨ ਲੱਗਿਆ।  ਫਿਰ ਮੇਲੇ-ਮੁਸਾਵਿਆਂ ਵਿੱਚ ਜੌਹਰ ਦਿਖਾਉਣ ਦੀ ਜਾਚ ਆ ਗਈ । ਭਾਰਤ ਦੇ ਵੱਡੇ ਵੱਡੇ ਰੈਸਲਰ ਮੁਕਾਬਲਿਆਂ ਵਿੱਚ ਜਾ ਲੰਗੋਟ ਪਹਿਨਣ ਲੱਗਿਆ । ਭਾਰਤੀ ਸਟਾਈਲ ਰੈਸਲਿੰਗ ਵਿੱਚ 1947 ਨੂੰ ਉਸ ਨੇ ਸਿੰਗਾਪੁਰ ਦਾ ਭਲਵਾਨੀ ਗੇੜਾ ਲਾਇਆ । ਕੁਆਲਾਲੰਪੁਰ ਵਿਖੇ ਤਰਲੋਕ ਸਿੰਘ ਨੂੰ ਹਰਾ ਕੇ ਮਲੇਸੀਅਨ ਚੈਂਪੀਅਨ ਦਾ ਖਿਤਾਬ ਜਿੱਤਿਆ । ਦਾਰਾ ਸਿੰਘ ਨੇ 1952 ਵਿੱਚ ਵਾਪਸੀ ਕੀਤੀ ਅਤੇ 1954 ਵਿੱਚ ਭਾਰਤ ਦਾ ਚੈਂਪੀਅਨ ਬਣ ਗਿਆ । ਰੁਸਤਮ-ਇ-ਪੰਜਾਬ ਦਾ ਖਿਤਾਬ 1966 ਵਿੱਚ ਅਤੇ ਰੁਸਤਮ-ਇ-ਹਿੰਦ ਦਾ ਖਿਤਾਬ 1978 ਵਿੱਚ ਹਾਸਲ ਕਰਿਆ। ਦਾਰਾ ਸਿੰਘ ਨੇ ਸਾਰੇ ਕਾਮਨਵੈਲਥ ਮੁਲਕਾਂ ਦਾ ਟੂਰ ਲਾਇਆ ਅਤੇ ਕਿੰਗ ਕੌਂਗ,ਜੌਰਜ ਗੌਰਡਿੰਕੋ,(ਕੈਨੇਡਾ),ਜੌਹਨ ਡਿਸਿਲਵਾ (ਨਿਊਜੀਲੈਂਡ),ਨੂੰ ਵੀ ਹਰਾਇਆ ਅਤੇ 1959 ਵਿੱਚ ਕਾਮਨਵੈਲਥ ਚੈਂਪੀਅਨ ਵੀ ਅਖਵਾਇਆ ।

ਦਾਰਾ ਸਿੰਘ ਨੇ ਅਮਰੀਕਾ ਦੇ ਲੌ ਥੈਸਿਜ ਨੂੰ ਮਾਤ ਦਿੱਤੀ ਅਤੇ 29 ਮਈ 1968 ਨੂੰ ਉਹ ਵਿਸਵ ਚੈਂਪੀਅਨ ਬਣ ਗਿਆ । ਆਪਣੇ ਇਸ ਖਿਤਾਬ ਦੀ ਰੱਖਿਆ ਲਈ ਇੱਕ ਵਾਰ ਫਿਰ ਵਿਸਵ ਭ੍ਰਮਣ ਕਰਿਆ ਅਤੇ ਅਖੀਰ ਰਿਟਾਇਰ ਹੋਣ ਦੇ ਐਲਾਨ 1983 ਤੱਕ ਉਸ ਨੂੰ ਕੋਈ ਨਾ ਹਰਾ ਸਕਿਆ । ਉਸ ਦੇ ਸਖਤ ਮੁਕਾਬਲੇ ਪਾਕਿਸਤਾਨ ਦੇ ਤਾਰਿਕ ਅਲੀ,ਮਜੀਦ ਅਕਰਾ,ਸਾਨੇ ਅਲੀ(ਪਾਕਿਸਤਾਨ),ਪ੍ਰਿੰਸ ਕਮਾਲੀ (ਅਫਰੀਕੀ ਚੈਪੀਅਨ), ਗਰੇਟ ਰਿੱਕੀਡੋਜਾਨ (ਜਪਾਨ),ਬਿੱਲ ਰੌਬਿਨਸਨ (ਯੂਰਪੀਅਨ ਚੈਪੀਅਨ),ਪਟਰੌਚ (ਇੰਗਲੈਡ ਚੈਪੀਅਨ),ਤੋਂ ਇਲਾਵਾ ਡੇਵਿਡ ਟੇਲਰ,ਡੈਨੀ ਲਾਂਚ,ਮਨ ਮੌਂਟੇਨ ਜੈਕ,ਕੈਸਵੈੱਲ ਜੈਕ,ਸਕਾਈ ਹਾਇ,ਜੌਰਜ ਬਰਗਰਜ,ਵੀ ਇਸ ਤੋਂ ਤ੍ਰਹਿੰਦੇ ਸਨ । ਰੈਸਲਰ ਗੁਰ ਮੰਤਰ ਸਿੱਖਣ ਵਾਲਿਆਂ ਅਤੇ ਹੋਰਨਾਂ ਭਲਵਾਨਾਂ ਦਾ ਦਾਰਾ ਸਿੰਘ ਕੋਲ ਮੇਲਾ ਹੀ ਲੱਗਿਆ ਰਹਿੰਦਾ ਸੀ । ਇੱਕ ਅੰਦਾਜੇ ਅਨੁਸਾਰ ਉਸ ਨੇ 500 ਮੁਕਾਬਲੇ ਲੜੇ ਅਤੇ ਜਿੱਤੇ । ਦਾਰਾ ਸਿੰਘ ਦੀ ਭਲਵਾਨੀ ਏਨੀ ਬਲਵਾਨ ਸੀ ਕਿ ਉਹਦਾ ਮੁਕਾਬਲਾ ਵੇਖਣ ਲਈ ਭੀੜਾਂ ਜੁੜ ਜਾਇਆ ਕਰਦੀਆਂ ਸਨ । ਇੱਥੋਂ ਤੱਕ ਕਿ ਦੇਸ ਦੇ ਪ੍ਰਧਾਨ ਮੰਤਰੀ ਪੰਡਤ ਜਵਾਹਰ ਲਾਲ ਨਹਿਰੂ,ਮੁਰਾਰ ਜੀ ਡਿਸਾਈ,ਚੌਧਰੀ ਚਰਨ ਸਿੰਘ,ਰਾਜੀਵ ਗਾਂਧੀ,ਚੰਦਰਸੇਖਰ ਅਤੇ ਭਾਰਤ ਦੇ ਰਾਸਟਰਪਤੀ ਗਿਆਂਨੀ ਜੈਲ ਸਿੰਘ ਵਰਗੇ ਵੀ ਉਹਦੇ ਜੌਹਰ ਵੇਖਿਆ ਕਰਦੇ ਸਨ । ਹਿੰਦੀ ਫਿਲਮਾਂ ਰਾਹੀਂ 1962 ਨੂੰ ਫਿਲਮੀ ਖੇਤਰ ਵਿੱਚ ਪ੍ਰਵੇਸ ਪਾਉਣ ਵਾਲੇ ਦਾਰਾ ਸਿੰਘ ਨੂੰ ਅਗਸਤ 2003 ਵਿੱਚ ਭਾਰਤੀ ਜਨਤਾ ਪਾਰਟੀ ਨੇ ਰਾਜ ਸਭਾ ਦਾ ਮੈਂਬਰ ਵੀ ਨੌਮੀਨੇਟ ਕੀਤਾ ।
ਦਾਰਾ ਸਿੰਘ ਵੱਲੋਂ ਭਲਵਾਨੀ ਤੋਂ ਰਿਟਾਇਰ ਹੋਣ ਦੇ ਐਲਾਨ ਸਮੇ ਦਿੱਲੀ ਵਿੱਚ ਰਾਜੀਵ ਗਾਂਧੀ ਦੀ ਹਾਜਰੀ ਵਿੱਚ ਰਾਸਟਰਪਤੀ ਗਿਆਨੀ ਜੈਲ ਸਿੰਘ ਨੇ ਐਕਸਨ ਕਿੰਗ ਆਫ ਬਾਲੀਵੁੱਡ ਕਹਿੰਦਿਆਂ ਸਨਮਾਨਿਤ ਕਰਿਆ । ਇਸ ਤੋਂ ਬਾਅਦ 1970 ਵਿੱਚ ਵੀ ਵਿਸੇਸ ਸਨਮਾਨ ਦਿੱਤਾ ਗਿਆ । ਤਿੰਨ ਪੁੱਤਰਾਂ ਪਰਦੱਮਣ ਸਿੰਘ,ਵਿੰਦੂ ਦਾਰਾ ਸਿੰਘ,ਅਮਰੀਕ ਸਿੰਘ ਤੋਂ ਇਲਾਵਾ ਤਿੰਨ ਧੀਆਂ ਦੇ ਪਿਤਾ ਦਾਰਾ ਸਿੰਘ ਦੀ ਫਿਲਮੀ ਖੇਤਰ ਵਿੱਚ ਵੀ ਪੂਰੀ ਭਲਵਾਨੀ ਚੱਲੀ । ਸਮੇ ਦੀ ਨਾਮਵਰ ਐਕਟਰਿਸ ਮੁਮਤਾਜ ਨਾਲ 16 ਫਿਲਮਾਂ ਵਿੱਚ ਕੰਮ ਕੀਤਾ । ਰਾਮਾ ਨੰਦ ਸਾਗਰ ਦੇ ਰਮਾਇਣ ਟੀਵੀ ਸੀਰੀਅਲ 1980 ਅਤੇ 1990 ਵਿੱਚ ਦਾਰਾ ਸਿੰਘ ਨੇ ਹਨੂਮਾਨ ਦੀ ਜਬਰਦਸਤ ਭੂਮਿਕਾ ਨਿਭਾਈ । ਉਹ ਹਦ ਕਰ ਦੀ,ਵਿੱਚ ਵੀ ਵਧੀਆ ਨਿਭਿਆ। ਕਰੀਬ 100 ਫਿਲਮਾਂ ਵਿੱਚ ਕੰਮ ਕਰਨ ਵਾਲੇ ਦਾਰਾ ਸਿੰਘ ਨੇ ਦਿਲ ਆਪਨਾ ਪੰਜਾਬੀ,ਮੈ ਮਾਂ ਪੰਜਾਬੀ ਵਿੱਚ ਵੀ ਭੂਮਿਕਾ ਨਿਭਾਈ ਅਤੇ ਉਸ ਨੇ ਮੁਹਾਲੀ ਵਿੱਚ ਦਾਰਾ ਫਿਲਮੀ ਸਟੁਡੀਓ ਵੀ ਬਣਾਇਆ । ਜਿਸ ਨੇ ਕਿਸੇ ਵੀ ਕੁਸ਼ਤੀ ਮੁਕਾਬਲੇ ਵਿੱਚ ਹਾਰ ਨਹੀਂ ਸੀ ਮੰਨੀ,ਉਹ ਜ਼ਿੰਦਗੀ ਦੀ ਆਖ਼ਰੀ ਕੁਸ਼ਤੀ ਹਾਰ ਗਿਆ ।

                                               ***************************
ਰਣਜੀਤ ਸਿੰਘ ਪ੍ਰੀਤ

ਸਪੇਨ ਨੇ ਇਟਲੀ ਨੂੰ 4-0 ਨਾਲ ਹਰਾਕੇ ਜਿੱਤਿਆ ਯੂਰੋ ਕੱਪ ਫਾਈਨਲ

ਸਪੇਨ ਨੇ ਇਟਲੀ ਨੂੰ 4-0 ਨਾਲ ਹਰਾਕੇ ਜਿੱਤਿਆ ਯੂਰੋ ਕੱਪ ਫਾਈਨਲ
ਕਈ ਰਿਕਾਰਡ ਦਰਜ ਹੋਏ ਸਪੇਨ ਦੇ ਨਾਅ
ਰਣਜੀਤ ਸਿੰਘ ਪ੍ਰੀਤ ਦੀ ਰਿਪੋਰਟ
8 ਜੂਨ ਤੋਂ ਪੋਲੈਂਡ ਅਤੇ ਯੂਕਰੇਨ ਦੀ ਮੇਜਬਾਨੀ ਅਧੀਨ ਖੇਡੇ ਗਏ 14 ਵੇਂ ਯੂਰੋ ਕੱਪ ਦਾ ਪਹਿਲੀ ਜੁਲਾਈ ਵਾਲਾ ਓਲੰਪਿਕ ਸਟੇਡੀਅਮ ਕੀਵ ਵਿਚਲਾ ਫਾਈਨਲ ਜਦ ਸਪੇਨ ਨੇ ਇਟਲੀ ਨੂੰ 4-0 ਨਾਲ ਹਰਾਕੇ ਜਿੱਤਿਆ ਤਾਂ ਇਸ ਦੇ ਨਾਲ ਹੀ ਕਈ ਨਵੇਂ ਰਿਕਾਰਡ ਫੁੱਟਬਾਲ ਇਤਿਹਾਸ ਦੇ ਨਵੇਂ ਪੰਨਿਆਂ ਦਾ ਸਿੰਗਾਰ ਬਣ ਗਏ । ਫਾਈਨਲ ਮੈਚ ਨੂੰ ਸੁਰੂ ਹੋਇਆਂ ਅਜੇ 14 ਮਿੰਟ ਹੀ ਹੋਏ ਸਨ ਕਿ ਡੇਵਿਡ ਸਿਲਵਾ ਨੇ ਗੋਲ ਕਰਕੇ ਆਪਣੀ ਟੀਮ ਨੂੰ 1-0 ਨਾਲ ਬੜਤ ਦਿਵਾ ਦਿੱਤੀ । ਜੋਰਡੀ ਅਲਬਾ ਨੇ 41 ਵੇਂ ਮਿੰਟ ਵਿੱਚ ਦੂਜਾ ਗੋਲ ਕਰਕੇ ਸਮੇ ਦੇ ਅੰਕ ਵੀ 14 ਤੋਂ 41 ਵਿੱਚ ਬਦਲ ਦਿਖਾਏ । ਧੀਮੀ ਖੇਡ ਰਹੀ ਇਟਲੀ ਲਈ ਵਾਪਸੀ ਦੇ ਰਸਤੇ ਕਰੀਬ ਕਰੀਬ ਬੰਦ ਹੀ ਹੋ ਚੁੱਕੇ ਸਨ । ਅੱਧੇ ਸਮੇ ਤੱਕ ਸਕੋਰ 2-0 ਨਾਲ ਸਪੇਨ ਦੇ ਪੱਖ ਵਿੱਚ ਰਿਹਾ । ਮੈਚ ਦੇ 84 ਵੇਂ ਮਿੰਟ ਵਿੱਚ ਫਰਨਾਂਡੋ ਟੌਰਿਸ ਨੇ ਤੀਜਾ ਗੋਲ ਦਾਗ ਦਿੱਤਾ । ਹੁਣ ਸਪੇਨ ਨੂੰ ਆਪਣੀ ਜਿੱਤ ਯਕੀਨੀ ਦਿਸਣ ਲੱਗੀ । ਪਰ ਅਜੇ 4 ਮਿੰਟ ਹੀ ਹੋਰ ਬੀਤੇ ਸਨ ਜਾਂ ਇਹ ਕਹਿ ਲਵੋ ਕਿ ਮੈਚ ਸਮਾਪਤੀ ਤੋਂ ਸਿਰਫ ਦੋ ਹੀ ਮਿੰਟ ਪਹਿਲਾਂ ਜੁਆਨ ਮੱਤਾ ਨੇ ਚੌਥਾ ਗੋਲ ਕਰਦਿਆਂ ਸਪੇਨ ਦੀ ਜਿੱਤ ਉੱਤੇ ਮੁਹਰ ਲਗਾ ਦਿੱਤੀ । ਜਿਓਂ ਹੀ ਇਸ ਮੁਕਾਬਲੇ ਦੇ ਆਖਰੀ 31 ਵੇਂ ਮੈਚ ਦੇ ਸਮੇ ਦੀ ਸਮਾਪਤੀ ਲਈ ਸੀਟੀ ਪੁਰਤਗਾਲ ਦੇ ਰੈਫਰੀ ਪੈਡਰੋ ਪ੍ਰੋਇਨਸਾ ਨੇ ਵਜਾਈ ਤਾਂ ਜਿੱਥੇ ਸਪੈਨਿਸ ਖਿਡਾਰੀ ਨੱਚ ਉੱਠੇ ,ਉੱਥੇ 63 ਹਜਾਰ ਦਰਸਕ ਵੀ ਤਾੜੀਆਂ-ਕਿਲਕਾਰੀਆਂ ਮਾਰਨ ਲੱਗੇ । ਸਪੇਨੀ ਖਿਡਾਰੀ ਅੰਡਰਿਸ ਇਨਇਸਟਾ ਮੈਨ ਆਫ ਦਾ ਮੈਚ ਅਖਵਾਇਆ ਅਤੇ ਕੋਚ ਵਿਕਿੰਟੇ ਡੈਲ ਬੌਸਕੀ ਤੋਂ ਖੁਸੀ ਵਿੱਚ ਬੋਲਿਆ ਵੀ ਨਹੀਂ ਸੀ ਜਾ ਰਿਹਾ ।
ਇਸ ਵਾਰੀ 3-3 ਗੋਲ ਕਰਨ ਵਾਲੇ ਭਾਵੇਂ 6 ਖਿਡਾਰੀ ਸਨ ,ਪਰ ਗੋਲਡਨ ਬੂਟ ਦਾ ਖਿਤਾਬ ਸਪੇਨ ਦੇ ਫਰਨਾਂਡੋ ਟੌਰਿਸ ਦੇ ਹਿੱਸੇ ਰਿਹਾ । ਪਿਛਲੇ 2008 ਵਾਲੇ ਯੂਰੋ ਕੱਪ ਸਮੇ ਵੀ ਸਪੇਨ ਦੇ ਹੀ ਡੇਵਿਡ ਵਿੱਲਾ ਨੇ 4 ਗੋਲ ਕਰਕੇ ਗੋਲਡਨ ਬੂਟ ਹਾਸਲ ਕਰਿਆ ਸੀ । ਪਿਛਲੀ ਵਾਰ 77 ਗੋਲ ਹੋਏ ਸਨ,ਪਰ ਇਸ ਵਾਰੀ 76 ਹੋਏ ਹਨ । ਜਦੋਂ ਕਿ ਇਸ ਪੱਖ ਤੋਂ ਰਿਕਾਰਡ 85 ਗੋਲਾਂ ਦਾ ਹੈ ।
                       ਯੂਰੋ ਕੱਪ 2012 ਦੇ ਫਾਈਨਲ ਨੇ ਕਈ ਨਵੇਂ ਰਿਕਾਰਡ ਕਾਇਮ ਕਰ ਦਿੱਤੇ ਹਨ । ਇਹ ਪਹਿਲਾ ਅਜਿਹਾ ਫਾਈਨਲ ਹੈ ਜਿਸ ਵਿੱਚ 90 ਮਿੰਟ ਦੌਰਾਂਨ 4-0 ਨਾਲ ਕੋਈ ਟੀਮ ਜੇਤੂ ਬਣੀ ਹੈ । ਇਹ ਰਿਕਾਰਡ ਸਪੇਨ ਦੇ ਨਾਅ ਦਰਜ ਹੋ ਗਿਆ ਹੈ । ਸਪੇਨ ਨੇ ਯੂਰੋ ਕੱਪ ਦੀ ਉਹ .ਪਰੰਪਰਾ ਵੀ ਤੋੜ ਦਿੱਤੀ ਹੈ ਕਿ ਕੋਈ ਟੀਮ ਲਗਾਤਾਰ ਦੋ ਵਾਰੀ ਖਿਤਾਬ ਜੇਤੂ ਨਹੀਂ ਬਣ ਸਕਦੀ । ਸਪੇਨ ਨੇ 2008 ਅਤੇ 2012 ਦਾ ਫਾਈਨਲ ਜਿੱਤ ਕੇ ਇਹ ਰਿਕਾਰਡ ਬਣਾਇਆ ਹੈ । ਸਪੇਨ ਨੇ ਵਿਸਵ ਕੱਪ,ਅਤੇ ਦੋ ਵਾਰ ਯੂਰੋ ਕੱਪ ਜਿੱਤ ਕੇ ਵੀ ਲਗਾਤਾਰ ਤਿੰਨ ਜਿੱਤਾਂ ਦਾ ਰਿਕਾਰਡ ਕਾਇਮ ਕਰਿਆ ਹੈ । ਸਪੇਨ ਹੀ ਅਜਿਹਾ ਮੁਲਕ ਹੈ ਜਿਸ ਨੇ ਇਸ ਮੁਕਾਬਲੇ ਵਿੱਚ 9 ਵਾਰੀ ਭਾਗ ਲੈਂਦਿਆਂ 4 ਵਾਰੀ ਸੈਮੀਫਾਈਨਲ ਪ੍ਰਵੇਸ ਪਾ ਕੇ ਚਾਰੋਂ ਵਾਰ ਹੀ ਫਾਈਨਲ ਖੇਡਕੇ 3 ਵਾਰ (1964,2008,2012) ਖਿਤਾਬ ਜਿੱਤਿਆ ਹੈ ਅਤੇ ਜਰਮਨੀ ਦੀ ਬਰਾਬਰੀ ਕਰ ਲਈ ਹੈ । ਫਾਈਨਲ ਖੇਡੀਆਂ ਦੋਹਾਂ ਟੀਮਾਂ ਦੇ ਹਿੱਸੇ ਵੀ ਬਰਾਬਰ ਬਰਾਬਰ ਹੀ 13-13 ਪੀਲੇ ਕਾਰਡ ਰਹੇ ਹਨ । ਪਰ ਸਪੇਨ ਨੇ ਪੂਰਾ ਇੱਕ ਸੈਂਕੜਾ ਅਤੇ ਇਟਲੀ ਨੇ 97 ਫਾਊਲ ਕੀਤੇ ਹਨ । ਇਟਲੀ ਭਾਵੇਂ ਖਿਤਾਬ ਨਹੀਂ ਜਿੱਤ ਸਕਿਆ,ਪਰ ਉਸ ਨੇ 62 ਅਤੇ ਸਪੇਨ ਨੇ 37 ਟਾਰਗਿਟ ਹਮਲੇ ਕੀਤੇ ਹਨ । ਸਪੇਨ ਦਾ ਕਪਤਾਨ ਇੱਕਰ ਕੈਸਿਲਸ 2000 ਤੋਂ 2012 ਤੱਕ ਯੂਰੋ ਕੱਪ ਖੇਡਿਆ ਹੈ,ਇਸ ਨੇ 14 ਮੈਚਾਂ ਵਿੱਚ ਹਿੱਸਾ ਲਿਆ ਹੈ ਅਤੇ 9 ਕਲੀਨ ਸੀਟ ਲਈਆਂ ਹਨ ।
             ਯੂਰੋ ਕੱਪ ਦੇ ਫਾਈਨਲ ਵਿੱਚ ਹੁਣ ਤੱਕ 12 ਟੀਮਾਂ ਹੀ ਪਹੁੰਚੀਆਂ ਹਨ,ਪਰ ਇਹਨਾ ਵਿੱਚੋਂ 9 ਟੀਮਾਂ ਹੀ ਖਿਤਾਬ ਜੇਤੂ ਅਖਵਾਈਆਂ ਹਨ । ਇਸ ਵਾਰੀ ਪਨੈਲਟੀ ਸੂਟ ਆਊਟ ਵਾਲੇ ਮੈਚ ਤੋਂ ਬਿਨਾਂ ਸਪੇਨ ਸਿਰ ਸਿਰਫ ਇੱਕ ਗੋਲ ਹੀ ਹੋਇਆ,ਜਦੋਂ ਕਿ 12 ਗੋਲ ਕੀਤੇ । ਸਪੇਨ ਨੇ 5 ਮੈਚ ਜਿੱਤੇ,ਇੱਕ ਸਾਵਾਂ ਖੇਡਿਆ । ਇਟਲੀ ਨੇ 8 ਵਾਰੀ ਯੂਰੋ ਕੱਪ ਖੇਡਦਿਆਂ,5 ਸੈਮੀਫਾਈਨਲ ਖੇਡੇ ਹਨ,ਪਰ ਇੱਕ ਹੀ ਜਿੱਤ 1968 ਵਿੱਚ ਹਾਸਲ ਕੀਤੀ ਹੈ,2000 ਅਤੇ 2012 ਵਿੱਚ ਦੂਜਾ ਸਥਾਨ ਲਿਆ ਹੈ । ਇਸ ਵਾਰੀ 3 ਜਿੱਤੇ ,2 ਬਰਾਬਰ ਰੱਖੇ,ਅਤੇ ਫਾਈਨਲ ਹਾਰਿਆ । ਕੁੱਲ 10 ਗੋਲ ਕੀਤੇ ਅਤੇ 9 ਕਰਵਾਏ । ਫਾਈਨਲ ਖੇਡਣ ਵਾਲੇ ਦੋਨੋ ਮੁਲਕਾਂ ਦਾ ਕੁੱਲ ਮਿਲਾਕੇ ਇਹ 27 ਵਾਂ ਮੈਚ ਸੀ,ਜਿਸ ਵਿੱਚੋ ਦੋਹਾਂ ਨੇ 8-8 ਮੈਚ ਜਿੱਤੇ ਹਨ,ਅਤੇ 11 ਮੈਚ ਬਰਾਬਰ ਰਹੇ ਹਨ ।

ਹੁਣ ਤੱਕ ਦੇ ਜੇਤੂਆਂ ਦਾ ਵੇਰਵਾ;-

ਸਾਲ	ਮੇਜ਼ਬਾਨ	ਫਾਈਨਲ
		ਜੇਤੂ	ਸਕੋਰ	ਉਪ-ਜੇਤੂ
1960	ਫਰਾਂਸ	ਸੋਵੀਅਤ ਸੰਘ	2-1	ਯੋਗੋਸਲਾਵੀਆ
1964	ਸਪੇਨ	ਸਪੇਨ	2–1	ਸੋਵੀਅਤ ਸੰਘ
1972	ਬੈਲਜੀਅਮ	ਪੱਛਮੀ ਜਰਮਨੀ	3–0	ਸੋਵੀਅਤ ਸੰਘ
1976	ਯੋਗੋਸਲਾਵੀਆ	ਚੈਕੋਸਲਵਾਕੀਆ	2–2       (5–3) ਪਸ	ਪੱਛਮੀ ਜਰਮਨੀ
1980	ਇਟਲੀ	ਪੱਛਮੀ ਜਰਮਨੀ	2–1	ਬੈਲਜੀਅਮ
1984	ਫਰਾਂਸ	ਫਰਾਂਸ	2–0	ਸਪੇਨ
1988	ਪੱਛਮੀ ਜਰਮਨੀ	ਨੀਦਰਲੈਂਡ	2–0	ਸੋਵੀਅਤ ਸੰਘ
1992	ਸਵੀਡਨ	ਡੈਨਮਾਰਕ	2–0	ਜਰਮਨੀ
1996	ਇੰਗਲੈਂਡ	ਜਰਮਨੀ	2–1	ਚੈੱਕ ਗਣਰਾਜ
2000	ਬੈਲਜੀਅਮ ਨੀਦਰਲੈਂਡ	ਫਰਾਂਸ	2–1	ਇਟਲੀ
2004	ਪੁਰਤਗਾਲ	ਯੂਨਾਨ	1–0	ਪੁਰਤਗਾਲ
2008	ਆਸਟਰੀਆ ਸਵਿਟਜ਼ਰਲੈਂਡ	ਸਪੇਨ	1–0	ਜਰਮਨੀ
2012	ਪੋਲੈਂਡ ਯੁਕਰੇਨ	ਸਪੇਨ	4-0	ਇਟਲੀ

ਅਬ ਕੇ ਹਮ ਵਿਛੜੇ ਤੋ ਕਭੀ ਖ਼ਵਾਬੋਂ ---” ਮਹਿੰਦੀ ਹਸਨ

ਅਬ ਕੇ ਹਮ ਵਿਛੜੇ ਤੋ ਕਭੀ ਖ਼ਵਾਬੋਂ ---” ਮਹਿੰਦੀ ਹਸਨ
                                                    ਰਣਜੀਤ ਸਿੰਘ ਪ੍ਰੀਤ
                                       ਖ਼ਾਨ ਸਾਹਿਬ ਦੇ ਨਾਂਅ ਨਾਲ ਪ੍ਰਸਿੱਧੀ ਹਾਸਲ ਕਰਨ ਵਾਲੇ,ਸ਼ਾਸ਼ਤਰੀ ਸੰਗੀਤ,ਪਿੱਠਵਰਤੀ ਗਾਇਕ ਅਤੇ ਗ਼ਜ਼ਲ ਗਾਇਕੀ ਦੇ ਬੇਤਾਜ ਬਾਦਸ਼ਾਹ,ਹਰਮੋਨੀਅਮ ਨੂੰ ਉਂਗਲਾਂ 'ਤੇ ਨਾਚ ਨਚਾਉਣ ਵਾਲੇ,1957 ਤੋਂ 1999 ਤੱਕ ਚੁਸਤੀ-ਫ਼ੁਰਤੀ ਦੀ ਮਿਸਾਲ ਬਣੇ ਰਹਿਣ ਵਾਲੇ, ਡਿਸਕੋਗਰਾਫ਼ੀ ਲਈ ਕਹਿਨਾ ਉਸੇ”,”ਨਜ਼ਰਾਨਾ, ਲਾਈਵ ਐਟ ਰੌਇਲ ਅਲਬਿਰਟ ਹਾਲ”,”ਅੰਦਾਜ਼ ਇ ਮਸਤਾਨਾ “,ਕਲਾਸੀਕਲ ਗ਼ਜ਼ਲਜ਼ ਭਾਗ 1,2,3 ”,”ਦਿਲ ਜੋ ਰੋਤਾ ਹੈ”,”ਗਾਲਿਬ ਗ਼ਜ਼ਲਜ਼ ”,” ਗ਼ਜ਼ਲਜ਼ ਫਾਰ ਐਵਰ ”,”ਭਾਗ ਪਹਿਲਾ ਆਦਿ ਪੇਸ਼ ਕਰਨ ਵਾਲੇ,ਅਤੇ “ਆਗੇ ਬੜੇ ਨਾ ਕਿੱਸਾ- ਇ- ਇਸ਼ਕ ”,”ਆਜ ਤੱਕ ਯਾਦ ਹੈ ਵੋਹ ਪਿਆਰ ਕਾ ਮੰਜ਼ਿਰ”,”ਆਂਖੋਂ ਸੇ ਮਿਲੀ ਆਂਖੇ”,”ਆਪ ਕੀ ਆਂਖੋਂ ਨੇ”,”ਆਏ ਕੁੱਛ ਅਬਰ ਕੁੱਛ ਸ਼ਰਾਬ ਆਏ”,”ਅਬ ਕੇ ਵਿਛੜੇ ਤੋ ਸ਼ਾਇਦ ਕਭੀ ਖ਼ਵਾਬੋਂ ਮੇਂ ਮਿਲੇਂ”,”ਐ ਰੌਸ਼ਨੀਓਂ ਕੇ ਸ਼ਹਿਰ”,”ਏਕ ਬੱਸ ਤੂ ਹੀ ਨਹੀਂ”,”ਆਪਨੋ ਨੇ ਗ਼ਮ ਦੀਆ”,”ਭੂਲੀ ਵਿਸਰੀ ਚੰਦ ਉਮੀਦੇਂ”,”ਚਲਤੇ ਹੋ ਤੋ ਚਮਨ ਕੋ ਚਲੀਏ”,”ਚਿਰਾਗ਼ -ਇ -ਤੂਰ”,”ਦੇਖ ਤੋ ਦਿਲ “,”ਦਿਲ- ਇ- ਨਾਦਾਨ”,”ਦਿਲ ਕੀ ਬਾਤ ਲਬੋਂ ਪਰ ਲਾ ਕਰ “,”ਦਿਲ ਮੇਂ ਤੂਫ਼ਾਂਨ ਛੁਪਾ ਕੇ ਬੈਠਾਂ ਹੂੰ”,ਵਰਗੀਆਂ ਸਦਾ ਬਹਾਰ ਗ਼ਜ਼ਲਾਂ ਨਾਲ ਦਿਲਾਂ 'ਤੇ ਰਾਜ ਕਰਨ ਵਾਲੇ,ਜਨਾਬ ਰਸ਼ਦੀ ਦੇ ਨਾਲ ਹੀ ਪਾਕਿਸਤਾਨੀ ਫ਼ਿਲਮ ਜਗਤ ਵਿੱਚ ਬਾਦਸ਼ਾਹਤ ਕਰਨ ਦੇ ਮਾਲਿਕ ਉਸਤਾਦ ਮਹਿੰਦੀ ਹਸਨ ਦਾ ਜਨਮ ਸੰਗੀਤਕ ਘਰਾਣੇ ਕਲਾਵੰਤ ਕਬੀਲੇ ਦੀ 16ਵੀਂ ਪੀੜ੍ਹੀ ਵਿੱਚ 18ਜੁਲਾਈ 1927 ਨੂੰ ਲੂਨਾ,ਝੁਨਝੁਨ (ਰਾਜਸਥਾਨ) ਵਿੱਚ ਵਾਲਿਦ ਉਸਤਾਦ ਅਜ਼ੀਮ ਖ਼ਾਨ ਦੇ ਘਰ ਹੋਇਆ । ਮਹਿੰਦੀ ਹਸਨ ਦੇ ਪਿਤਾ ਅਤੇ ਉਸ ਦੇ ਚਾਚਾ ਉਸਤਾਦ ਇਸਮਾਈਲ ਖ਼ਾਨ ਰਿਵਾਇਤੀ ਧਰੁਪਦ ਗਾਇਕੀ ਨਾਲ ਸਬੰਧਤ ਸਨ। ਜਦ ਦੇਸ਼ ਦਾ ਬਟਵਾਰਾ ਹੋਇਆ ,ਤਾਂ ਮਹਿੰਦੀ ਹਸਨ ਨੂੰ ਵੀ ਬੜੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾਂ ਪਿਆ ,ਅਤੇ ਪਾਕਿਸਤਾਨ ਵਿੱਚ ਰੋਜ਼ੀ-ਰੋਟੀ ਲਈ ਕਾਫ਼ੀ ਮੁਸੀਬਤਾਂ ਝੱਲਣੀਆਂ ਪਈਆਂ।
                                ਦਿਨ ਕਟੀ ਲਈ ਮਹਿੰਦੀ ਹਸਨ ਨੇ ਪਹਿਲਾਂ ਇੱਕ ਸਾਇਕਲਾਂ ਦੀ ਦੁਕਾਂਨ 'ਤੇ ਕੰਮ ਕਰਨਾਂ ਸ਼ੁਰੂ ਕੀਤਾ ,ਅਤੇ ਫਿਰ ਕਾਰ ,ਡੀਜ਼ਲ ਟਰੈਕਟਰ ਮਕੈਨਿਕ ਦਾ ਕੰਮ ਕਰਨ ਲੱਗਿਆ। ਪਰ ਨਾਲੋ-ਨਾਲ ਗਾਇਕੀ ਅਭਿਆਸ ਦਾ ਪੱਲੂ ਵੀ ਫੜ•ੀ ਰੱਖਿਆ। । ਉਸਦੀ ਸਖ਼ਤ ਮਿਹਨਤ ਅਤੇ ਲਗਨ ਨੂੰ ਬੂਰ ਪਿਆ ਅਤੇ 1957 ਵਿੱਚ ਪਾਕਿਸਤਾਨ ਰੇਡੀਓ ਸਟੇਸ਼ਨ ਤੋਂ ਪੇਸ਼ਕਾਰੀ ਦਾ ਬੁਲਾਵਾ ਆ ਗਿਆ। ਮਹਿੰਦੀ ਹਸਨ ਨੇ ਜੋ ਠੁਮਰੀ ਪੇਸ਼ ਕੀਤੀ। ਉਸ ਨੂੰ ਬਹੁਤ ਸਲਾਹਿਆ ਗਿਆ। ਇਸ ਸਮੇਂ ਬੇਗ਼ਮ ਅਖ਼ਤਰ, ਉਸਤਾਦ ਬਰਕਤ ਅਲੀ ਖ਼ਾਂਨ, ਮੁਖ਼ਤਾਰ ਬੇਗ਼ਮ,ਗ਼ਜ਼ਲ ਗਾਇਕੀ ਦੇ ਨਾਮੀ ਕਲਾਕਾਰ ਸਨ। ਇਸ ਤੋਂ ਉਤਸ਼ਾਹਤ ਹੋ ਕਿ ਮਹਿੰਦੀ ਹਸਨ ਨੇ ਉਰਦੂ ਸ਼ਾਇਰੀ ਅਤੇ ਗ਼ਜ਼ਲ ਗਾਇਕੀ ਵੱਲ ਵਧੇਰੇ ਧਿਆਨ ਦਿੱਤਾ,ਇਸ ਕੰਮ ਲਈ ਜ਼ੈਡ ਏ ਬੁਖ਼ਾਰੀ,ਅਤੇ ਰਫ਼ੀਕ ਅਨਵਰ ਨੇ ਵੀ ਉਸਦਾ ਸਾਥ ਦਿੱਤਾ।
                         1980 ਵਿੱਚ ਗ਼ਜ਼ਲ ਦੇ ਇਸ ਸ਼ਹਿਨਸ਼ਾਹ ਨੂੰ ਅਜਿਹੀ ਬਿਮਾਰੀ ਨੇ ਆ ਦਬੋਚਿਆ ਕਿ ਸਦਾ ਸਦਾ ਲਈ ਗਾਇਕੀ ਨਾਲੋਂ ਤੋੜ-ਵਿਛੋੜਾ ਕਰਨਾਂ ਪਿਆ। ਲਾਹੌਰ ਤੋਂ ਵਾਪਸੀ ਲਾਉਂਦਿਆਂ ਆਪਣੀ ਪੱਕੀ ਰਿਹਾਇਸ਼ ਕਰਾਚੀ ਵਿੱਚ ਆ ਨਿਵਾਸ ਕੀਤਾ। ਪਰ ਉਂਝ ਗਾਇਕੀ ਨਾਲ 2010 ਤੱਕ ਜੁੜੇ ਰਹੇ। ਜਿੱਥੇ ਆਪ ਦੇ 9 ਲੜਕੇ ਅਤੇ 5 ਲੜਕੀਆਂ ਨੇ ਖੇਡਦਿਆਂ ਬਚਪਨ ਗੁਜ਼ਾਰਿਆ ਸੀ। ਮਹਿੰਦੀ ਹਸਨ ਦੇ ਬੱਚੇ ਵੀ ਸੰਗੀਤਕ ਰੁਚੀਆਂ ਰਖਦੇ ਹਨ। ਪਾਕਿਸਤਾਨ ਵਿੱਚ ਹੀ ਮਹਿੰਦੀ ਹਸਨ ਦਾ ਜਨਮ ਦਿਨ ਪੀ ਟੀ ਵੀ ਨੇ 2010 ਨੂੰ ਮਨਾਇਆ। ਗੱਲ ਅਕਤੂਬਰ 2010 ਦੀ ਹੈ, ਜਦ ਐਚ ਐਮ ਵੀ ਕੰਪਨੀ ਨੇ “ਸਰਹੱਦੇਂ” ਰਾਹੀਂ ਤੇਰਾ ਮਿਲਨਾ ”ਡਿਊਟ ਗੀਤ ਸਰੋਤਿਆਂ ਲਈ ਪੇਸ਼ ਕੀਤਾ ,ਜੋ ਮਹਿੰਦੀ ਹਸਨ ਅਤੇ ਲਤਾ ਮੰਗੇਸ਼ਕਰ ਦਾ ਸ਼ਾਇਦ ਪਹਿਲਾ ਅਤੇ ਆਖ਼ਰੀ ਡਿਊਟ ਸੀ । ਇਸ ਗੀਤ ਨੂੰ ਖ਼ੁਦ ਮਹਿੰਦੀ ਹਸਨ ਨੇ ਸੰਗੀਤਬੱਧ ਕੀਤਾ ਸੀ ਅਤੇ ਫਰਹਦ ਸ਼ਹਿਜਾਦ ਨੇ ਲਿਖਿਆ ਸੀ। ਇਸ ਗੀਤ ਨੂੰ ਜਨਾਬ ਮਹਿੰਦੀ ਹਸਨ ਨੇ 2009 ਵਿੱਚ ਪਾਕਿਸਤਾਨ ਵਿੱਚ ਰਿਕਾਰਡ ਕੀਤਾ ਸੀ। ਪਰ ਜਦੋਂ ਲਤਾ ਮੰਗੇਸ਼ਕਰ ਨੇ 2010 ਵਿੱਚ ਇਹ ਸੁਣਿਆਂ,ਤਾਂ ਇਸ ਵਿੱਚ ਸ਼ਮੂਲੀਅਤ ਕਰ ਲਈ।
                     ਮਾਨ-ਸਨਮਾਨ ਵਿੱਚ ਜਿੱਥੇ ਸਰੋਤਿਆਂ ਦਾ ਰੱਜਵਾਂ ਪਿਆਰ ਮਿਲਿਆ,ਉੱਥੇ ਹੀ ਜਨਰਲ ਅਯੂਬ ਖ਼ਾਨ ਨੇ “ਤਮਗਾ-ਇ-ਇਮਤਿਆਜ਼””,ਜ਼ਿਆ-ਉਲ-ਹੱਕ ਨੇ ਕਿਹਾ ਸਾਨੂੰ ਇਸ 'ਤੇ ਬਹੁਤ ਫ਼ਖ਼ਰ ਹੈ',ਜਨਰਲ ਪਰਵੇਜ਼ ਮੁਸ਼ੱਰਫ਼ ਨੇ ““ਨਿਗਾਰ ਫ਼ਿਲਮ ਅਤੇ ਗਰੈਜੂਏਟ”,“ਹਲਾਲ-ਇ-ਇਮਤਿਆਜ਼””ਐਵਾਰਡਜ਼ ਪਾਕਿਸਤਾਨ ਦੀ ਤਰਫ਼ੋਂ ਅਦਾਅ ਕੀਤੇ। ਭਾਰਤ ਦੇ ਮੀਡੀਆ ਸ਼ਹਿਰ ਜਲੰਧਰ ਵਿਖੇ 1979 ਵਿੱਚ ““ਸਹਿਗਲ”” ਐਵਾਰਡ,ਨੇਪਾਲ ਵਿੱਚ 1983 ਨੂੰ “ਗੋਰਖ਼ਾ ਦਕਸ਼ਿਨਾ ਬਾਹੂ” ਐਵਾਰਡ ਅਤੇ ਫਿਰ ਡੁਬਈ ਵਿੱਚ ਸਨਮਾਨਿਤ ਕੀਤਾ ਗਿਆ।
                 1970 ਵਿੱਚ ਕਾਬਲ (ਅਫ਼ਗਾਨਿਸਤਾਨ) ਵਿਖੇ ਪਰਸ਼ੀਅਨ ,ਦਾਰੀ ਵਿੱਚ ਗ਼ਜ਼ਲਾਂ ਗਾਉਂਣ ਵਾਲੇ 84 ਵਰ੍ਹਿਆਂ ਦੇ ਮਹਿਦੀੰ ਹਸਨ ਨੂੰ 11 ਜਨਵਰੀ ਦੇ ਦਿਨ ਕਰਾਚੀ ਦੇ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਸੀ ਅਤੇ ਉਹਨਾਂ ਨੂੰ ਵੈਂਟੀਲੇਟਰ ਸਹਾਰੇ ਰੱਖਿਆ ਗਿਆ ਸੀ। ਕੁੱਝ ਦਿਨ ਪਹਿਲਾਂ ਇਹ ਖ਼ਬਰ ਮਿਲੀ ਕਿ ਸ਼ਹਿਨਸ਼ਾਹ –ਇ-ਗ਼ਜ਼ਲ ਨਹੀਂ ਰਹੇ । ਪਰ ਉਹਨਾਂ ਦੇ ਗਾਇਕ ਬੇਟੇ ਆਸਿਫ਼ ਮਹਿੰਦੀ ਨੇ ਇਸ ਖ਼ਬਰ ਦਾ ਖੰਡਨ ਕਰਦਿਆਂ ਕਿਹਾ ਕਿ ““ਉਹ ਜੀਵਤ ਹਨ,ਅਤੇ ਡਾਕਟਰ ਕਾਫ਼ੀ ਮਿਹਨਤ ਨਾਲ ਇਲਾਜ ਕਰ ਰਹੇ ਹਨ।”“ਪਰ  ਉਹਨਾਂ ਦੀ ਹਾਲਤ ਲਗਾਤਾਰ ਵਿਗੜਦੀ ਗਈ,ਅਤੇ ਅਖ਼ੀਰ 13 ਜੂਨ ਦੀ ਦੁਪਹਿਰ 12.22 ਵਜੇ ਉਹਨਾਂ ਆਖ਼ਰੀ ਸਾਹ ਲਿਆ ਅਤੇ 14 ਜੂਨ ਨੂੰ ਸਪੁਰਦ-ਇ-ਖ਼ਾਕ ਕੀਤਾ ਗਿਆ । ਇਸ ਮੌਕੇ ਪਰਿਵਾਰ ਮੈਂਬਰਾਂ ਤੋਂ ਇਲਾਵਾ ਹੋਰ ਕਲਾ ਪ੍ਰੇਮੀ ਅਤੇ ਮਹਿੰਦੀ ਹਸਨ ਦੇ ਚਹੇਤੇ ਵੱਡੀ ਗਿਣਤੀ ਵਿੱਚ ਮੌਜੂਦ ਸਨ। ਜਿੰਨ੍ਹਾਂ ਨੇ ਸੇਜਲ ਅੱਖਾਂ ਨਾਲ ਅੰਤਿਮ ਵਿਦਾਇਗੀ ਦਿੱਤੀ।
            • ਉਹ ਆਪਣੀਆਂ ਇਹਨਾਂ ਡਿਸਕੋਗਰਾਫ਼ੀ ਅਤੇ ਸ਼ਾਹਕਾਰ ਗ਼ਜ਼ਲਾਂ ਜ਼ਰੀਏ ਸਾਨੂੰ ਹਰ ਪਲ ਚੇਤੇ ਆਉਂਦੇ ਰਹਿਣਗੇ :-* ਗੋਲਡਨ ਗਰੀਟਸ * ਇਨ ਕਨਸਰਟ * ਖੁੱਲ•ੀ ਜੋ ਆਂਖ * ਲਾਈਫ਼ ਸਟੋਰੀ * ਲਾਈਵ ਐਟ ਖਾਂਬੇਜ਼ * ਲਾਈਵ ਕਨਸਰਟ ਇਨ ਇੰਡੀਆ * ਮਹਿੰਦੀ ਹਸਨ * ਮਹਿੰਦੀ ਹਸਨ ਗ਼ਜ਼ਲਜ਼ ਭਾਗ ਪਹਿਲਾ* ਸਦਾ–ਇ-ਇਸ਼ਕ * ਸਰਹੱਦੇਂ * ਸੁਰ ਕੀ ਕੋਈ ਸੀਮਾਂ ਨਹੀਂ * ਦਾ ਫ਼ਾਈਨੈਸਟ ਗ਼ਜ਼ਲ * ਦਾ ਲੀਜਿੰਡ * ਯਾਦਗਾਰ ਗ਼ਜ਼ਲੇਂ ਭਾਗ ਪਹਿਲਾ * ਤਰਜ਼ ( ਵਿਦ ਸ਼ੋਬਾ ਗੁਰਤੂ ) * ਨਕਸ਼-ਇ-ਫ਼ਰਿਆਦੀ।
ਗ਼ਜ਼ਲਾਂ;-* ਦੁਨੀਆਂ ਕਿਸੀ ਕੇ ਪਿਆਰ ਮੇ ਜਨਤ ਸੇ ਕਮ ਨਹੀਂ * ਦਾਯਾਮ ਪੜਾ ਹੂਆ ਤੇਰੇ ਦਰ ਪੇ ਨਹੀਂ ਹੂੰ ਮੈ * ਏਕ ਬਾਰ ਚਲੇ ਆਓ * ਗੁਲਸ਼ਨ ਗੁਲਸ਼ਨ ਸ਼ੋਲਾ ਏ ਗੁਲ ਕੀ * ਗੁੰਚਾ-ਇ-ਸ਼ੌਕ ਲਗਾ ਹੈ ਖਿਲਨੇ * ਇੱਕ ਹੁਸਨ ਕੀ ਦੇਵੀ ਸੇ ਮੁਝੇ ਪਿਆਰ ਹੂਆ ਥਾ * ਜਬ ਭੀ ਆਤੀ ਹੈ ਤੇਰੀ ਯਾਦ ਕਭੀ ਸ਼ਾਮ ਕੇ ਬਾਅਦ * ਜਬ ਭੀ ਚਾਹੇਂ ਏਕ ਨਈ ਸੂਰਤ * ਜਬ ਭੀ ਪੀ ਕਰ * ਜਬ ਕੋਈ ਪਿਆਰ ਸੇ ਬੁਲਾਇਗਾ * ਜਬ ਉਸ ਜ਼ੁਲਫ਼ ਕੀ ਬਾਤ ਚਲੀ * ਜਹਾਂ ਜਾ ਕੇ ਚੈਨ * ਕਹਾਂ ਗਈ ਵੋਹ ਵਫ਼ਾ * ਖੁੱਲ੍ਹੀ ਜੋ ਆਂਖ ਵੋਹ ਥਾ * ਮੈ ਖ਼ਿਆਲ ਹੂੰ ਕਿਸੀ ਔਰ ਕਾ * ਮੈ ਨਜ਼ਰ ਸੇ ਪੀ ਰਹਾ ਹੂੰ * ਮੁਹੱਬਤ ਜ਼ਿੰਦਗੀ ਹੈ ਔਰ ਤੁਮ ਮੇਰੀ ਮੁਹੱਬਤ ਹੋ * ਪੱਤਾ ਪੱਤਾ ਬੂਟਾ ਬੂਟਾ * ਮੁਹੱਬਤ ਕਰਨੇ ਵਾਲੇ * ਫੂਲ ਹੀ ਫੂਲ ਖਿਲ ਉਠੇ * ਪਿਆਰ ਭਰੇ ਦੋ ਸ਼ਰਮੀਲੇ ਨੈਣ * ਰਫ਼ਤਾ ਰਫ਼ਤਾ ਵੋਹ ਮੇਰੀ ਹਸਤੀ ਕਾ ਸਮਾਨ ਹੋ ਗਏ* ਯੂੰ ਨਾ ਮਿਲ ਮੁਝਸੇ ਖ਼ਫ਼ਾ ਹੋ ਜੈਸੇ * ਯੇ ਧੂਆਂ ਕਹਾਂ ਸੇ ਉਠਤਾ ਹੈ * ਯੇ ਕਾਗਜ਼ੀ ਫੂਲ ਜੈਸੇ ਚਿਹਰੇ, ਦੀਆਂ ਗੱਲਾਂ ਅੱਜ ਵੀ ਉਹਦੇ ਤੁਰ ਜਾਣ 'ਤੇ ਤੁਰ ਰਹੀਆਂ ਹਨ,ਉਹਦੇ ਜਿਉਂਦੇ ਜੀਅ ਵੀ ਤੁਰਦੀਆਂ ਸਨ ਅਤੇ ਕੱਲ• ਵੀ ਤੁਰਦੀਆਂ ਰਹਿਣਗੀਆਂ । ਭਾਵੇਂ ਬਕੌਲ ਮਹਿੰਦੀ ਹਸਨ “ “ਅਬ ਕੇ ਹਮ ਵਿਛੜੇ ਸ਼ਾਇਦ ਕਭੀ ਖ਼ਵਾਬੋਂ ਮੇ ਮਿਲੇਂਗੇ”। “
**************************
ਰਣਜੀਤ ਸਿੰਘ ਪ੍ਰੀਤ
ਭਗਤਾ-151206 (ਬਠਿੰਡਾ)
ਮੁਬਾਇਲ ਸੰਪਰਕ:98157-07232

ਸੀਨੀਅਰ ਖੇਡ ਲੇਖਕ ਰਣਜੀਤ ਪ੍ਰੀਤ ਦੀ ਆਈ ਡੀ ਹੋਈ ਹੈਕ

ਸੀਨੀਅਰ ਖੇਡ ਲੇਖਕ ਰਣਜੀਤ ਪ੍ਰੀਤ ਦੀ ਆਈ ਡੀ ਹੋਈ ਹੈਕ

ਲੁਧਿਆਣਾ ( ਹਰਮੇਲ ਕਾਲਾ)

ਭਗਤਾ ਭਾਈ ਕਾ ਤੋਂ ਸਾਡੇ ਸੀਨੀਅਰ ਪੱਤਰਕਾਰ,ਸੇਵਾ ਮੁਕਤ ਗਜ਼ਟਿਡ ਅਫ਼ਸਰ ਅਤੇ ਨਾਮਵਰ ਲੇਖਕ ਸ.ਰਣਜੀਤ ਸਿੰਘ ਪ੍ਰੀਤ ਦੀ ਯਾਹੂ ਅਤੇ ਗੂਗਲ ਵਿੱਚ ਬਣੀ ਆਈ ਡੀ ਨੂੰ ਕਿਸੇ ਨੇ ਕਰੀਬ 18 ਘੰਟੇ ਹੈਕ ਕਰਕੇ ਆਪਣੇ ਕਬਜ਼ੇ ਵਿੱਚ ਰੱਖਿਆ । ਜਦ ਸ਼੍ਰੀ ਪ੍ਰੀਤ ਨੇ ਖ਼ਬਰਾਂ ਅਤੇ ਹੋਰ ਮੈਟਰ ਭੇਜਣ ਲਈ ਆਈ ਡੀ ਦੀ ਵਰਤੋਂ ਕਰਨੀ ਚਾਹੀ ,ਤਾਂ ਉਹ ਗੁਪਤ ਪਾਸ ਵਰਡ ਨਾਲ ਨਾ ਖੁੱਲ੍ਹੀ, ਉਹਨਾ ਨੇ ਅਜਿਹੀ ਵਾਰ ਵਾਰ ਕੋਸ਼ਿਸ਼ ਕੀਤੀ । ਅਖੀਰ ਜਦ ਉਹਨਾਂ ਧਿਆਨ ਨਾਲ ਵੇਖਿਆ ,ਤਾਂ ਲਿਖਿਆ ਹੋਇਆ ਸੀ ਕਿ ਤੁਸੀਂ 16 ਘੰਟੇ ਪਹਿਲਾਂ ਪਾਸਵਰਡ ਬਦਲਿਆ ਹੈ। ਪਰ ਹੁਣ ਤੁਸੀਂ ਪੁਰਾਣਾ ਪਾਸਵਰਡ ਵਰਤ ਰਹੇ ਹੋ। ਜਦੋਂ ਕਿ ਕੋਈ ਪਾਸ ਵਰਡ ਬਦਲਿਆ ਨਹੀਂ ਸੀ ਗਿਆ । ਅਚਾਨਕ ਉਹਨਾਂ ਨੇ ਕਿਸੇ ਮੰਤਵ ਲਈ ਸੈੱਲ ਫ਼ੋਨ ਦੇ ਇਨ ਬਾਕਸ ਵਿੱਚ ਜਦ ਮੈਸਿਜ਼ ਵੇਖੇ ਤਾਂ ਆਈ ਡੀ ਡਲੀਟ ਕਰਨ ਸਬੰਧੀ ਮੈਸਿਜ਼ ਇਸ ਹਵਾਲੇ ਨਾਲ ਆਇਆ ਪਿਆ ਸੀ 56767775 ਅਨੁਸਾਰ ਮਿਤੀ 6-6-12 ਸਮਾਂ 11.03 ਪੀ ਐਮ । ਉਹਨਾਂ ਨੇ ਕੋਸ਼ਿਸ਼ ਕਰਕੇ ਪਾਸ ਵਰਡ ਨਵਾਂ ਲਾਗੂ ਕਰਕੇ 7 ਜੂਨ ਨੂੰ ਬਾਅਦ ਦੁਪਹਿਰ ਆਈ ਡੀ ਨੂੰ ਮੁੜ ਚਾਲੂ ਕਰਿਆ । ਇਸ ਨਾਲ 350 ਦੇ ਕਰੀਬ ਮਿੱਤਰਤਾ ਸੱਦੇ ਅਤੇ ਹੋਰ ਜ਼ਰੂਰੀ ਡਾਟਾ ਡਲੀਟ ਹੋ ਗਿਆ ਜਾਂ ਕਿਸੇ ਨੇ ਜਾਣ-ਬੁੱਝ ਕਿ ਅਜਿਹਾ ਕਰ ਦਿੱਤਾ । ਸ਼੍ਰੀ ਪ੍ਰੀਤ ਨੇ ਮੰਗ ਕੀਤੀ ਹੈ ਕਿ ਫੇਸ ਬੁੱਕ ਪ੍ਰਬੰਧਕ ਜਾਂ ਹੋਰ ਸਮਰੱਥ ਅਧਿਕਾਰੀ ਇਸ ਦੀ ਪੜਤਾਲ ਕਰਨ ,ਤਾਂ ਜੋ ਕਿਸੇ ਨੇ ਇਸ ਦਾ ਕੋਈ ਦੁਰਉਪਯੋਗ ਨਾ ਕੀਤਾ ਹੋਵੇ ।

ਸੁਲਤਾਨ ਕੱਪ ਦਾ ਨਵਾਂ ਸੁਲਤਾਨ ਨਿਊਜ਼ੀਲੈਂਡ

       ਸੁਲਤਾਨ ਕੱਪ ਦਾ ਨਵਾਂ ਸੁਲਤਾਨ ਨਿਊਜ਼ੀਲੈਂਡ      

                                ਰਣਜੀਤ ਸਿੰਘ ਪ੍ਰੀਤ

                      ਇੱਕ ਵਾਰ ਫਿਰ ਮਲੇਸ਼ੀਆ ਦੀ ਹੀ ਧਰਤੀ ਤੇ 21ਵਾਂ ਸੁਲਤਾਨ ਅਜ਼ਲਾਨ ਸ਼ਾਹ ਕੱਪ ਹਾਕੀ ਮੁਕਾਬਲਾ ਈਪੋਹ ਵਿਖੇ 24 ਮਈ ਤੋਂ 3 ਜੂਨ ਤੱਕ ਖੇਡਿਆ ਗਿਆ । ਪਹਿਲੀ ਵਾਰੀ ਓਲੰਪਿਕ ਖੇਡਾਂ ਦੀ ਤਰਜ਼ 'ਤੇ ਨੀਲੀ ਪਿੱਚ ਅਤੇ ਪੀਬੀ ਗੇਂਦ ਦੀ ਵਰਤੋਂ ਕੀਤੀ ਗਈ । ਮੇਜ਼ਬਾਨ ਮਲੇਸ਼ੀਆ,ਏਸ਼ੀਆਈ ਚੈਂਪੀਅਨ ਪਾਕਿਸਤਾਨ, 2010 ਦੇ ਸਾਂਝੇ ਵਿਜੇਤਾ ਭਾਰਤ-ਦੱਖਣੀ ਕੋਰੀਆ, ਤੋਂ ਇਲਾਵਾ ਬਰਤਾਨੀਆਂ,ਅਰਜਨਟੀਨਾ ਅਤੇ ਨਿਊਜ਼ੀਲੈਂਡ ਦੀਆਂ ਟੀਮਾਂ ਸ਼ਾਮਲ ਹੋਈਆਂ । ਛੇ ਵਾਰੀ ਸੁਲਤਾਨ ਕੱਪ ਜਿੱਤਣ ਵਾਲਾ ਆਸਟਰੇਲੀਆ,ਦੋ ਵਾਰ ਜੇਤੂ ਬਣਿਆਂ ਜਰਮਨੀ,ਇੱਕ ਵਾਰੀ ਖਿਤਾਬਧਾਰੀ ਨੀਦਰਲੈਂਡ,ਅਤੇ ਸਪੇਨ ਵਰਗੇ ਮੁਲਕਾਂ ਨੇ ਟੀਮਾਂ ਹੀ ਨਹੀਂ ਸਨ ਭੇਜੀਆਂ । ਇਸ ਵਾਰੀ ਭਾਰਤ ਕੋਲ ਛੇਵਾਂ ਖਿਤਾਬ ਜਿੱਤ ਕੇ ਆਸਟਰੇਲੀਆ ਨਾਲ ਬਰਾਬਰ ਮੜਿੱਕਣ ਦਾ ਸੁਨਹਿਰੀ ਮੌਕਾ ਸੀ । ਪਰ ਭਰਤ ਚੇਤਰੀ ਦੀ ਕਪਤਾਨੀ ਵਾਲੀ ਭਾਰਤੀ ਟੀਮ ਅਜਿਹਾ ਨਹੀਂ ਕਰ ਸਕੀ ।  

                                   1983 ਤੋਂ ਸ਼ੁਰੂ ਹੋਇਆ ਅਤੇ 1998 ਤੋਂ ਹਰ ਸਾਲ ਕਰਵਾਇਆ ਜਾਂਦਾ ਇਹ ਹਾਕੀ ਮੁਕਾਬਲਾ ਭਾਰਤ ਨੇ 5 ਵਾਰੀ (1985,1991,1995,2009,2010 ) ਜਿਤਿਆ ਹੈ,2008 ਵਿੱਚ ਦੂਜਾ ਅਤੇ 5 ਵਾਰੀ (1983,2000,2006,2007,2012) ਤੀਜਾ ਸਥਾਨ ਲਿਆ । ਜਦੋਂ ਕਿ ਪਾਕਿਸਤਾਨ ਨੇ 3 ਜਿੱਤਾਂ (1999,2000,2003) ,6 ਵਾਰੀ ਦੋਇਮ (1983,1987,1991,1994,2004,2011) ਅਤੇ 2 ਵਾਰੀ (1985,2005) ਵਿੱਚ ਤੀਸਰਾ ਸਥਾਨ ਮੱਲਿਆ । ਦੱਖਣੀ ਕੋਰੀਆ ਨੇ 1996 ਅਤੇ ਭਾਰਤ ਨਾਲ ਸਾਂਝੇ ਜੇਤੂ ਵਜੋਂ 2010 ਵਿੱਚ ਜਿੱਤ ਦਰਜ ਕਰਨ ਦੇ ਨਾਲ ਹੀ 4 ਵਾਰੀ 1999,2000,2001,2005 ਵਿੱਚ ਦੂਜਾ ਅਤੇ 1998,2004 ਵਿੱਚ ਤੀਜੀ ਪੁਜ਼ੀਸ਼ਨ ਮੱਲੀ ਹੈ। ਅਰਜਨਟੀਨਾ ਨੇ 2008 ਵਿੱਚ ਅਤੇ ਬਰਤਾਨੀਆਂ 1994 ਵਿੱਚ ਜਿੱਤਾਂ ਦਰਜ ਕੀਤੀਆਂ ਹਨ । ਇਸ ਤੋਂ ਇਲਾਵਾ ਬਰਤਾਨੀਆਂ ਨੇ 1987 ਅਤੇ 2011 ਵਿੱਚ ਤੀਜਾ ਸਥਾਨ ਵੀ ਹਾਸਲ ਕਰਿਆ ਹੈ । ਮਲੇਸ਼ੀਆ ਨੇ 1985,2007,2009 ਚ ਦੂਜੀ ਅਤੇ 1996 ਵਿੱਚ ਤੀਜੀ ਪੁਜ਼ੀਸ਼ਨ ਲਈ ਹੈ।

                      2012 ਦੇ ਸੁਲਤਾਨ ਕੱਪ ਵਿੱਚ ਸ਼ਾਮਲ ਹੋਈਆਂ 7 ਟੀਮਾਂ ਨੇ ਪਹਿਲੇ ਗੇੜ ਵਿੱਚ 21 ਮੈਚ ਖੇਡੇ,ਸਿਰਫ ਤਿੰਨ ਮੈਚ 24 ਮਈ ਨੂੰ ਮਲੇਸ਼ੀਆ ਬਨਾਮ ਕੋਰੀਆ 1-1 ਨਾਲ, 25 ਮਈ ਨੂੰ ਬਰਤਾਨੀਆਂ ਬਨਾਮ ਮਲੇਸ਼ੀਆ 3-3 ਨਾਲ, 31 ਮਈ ਨੂੰ ਬਰਤਾਨੀਆਂ ਬਨਾਮ ਕੋਰੀਆ 1-1 ਨਾਲ,ਬਰਾਬਰੀ ਤੇ ਰਹੇ,ਜਦੋਂ ਕਿ ਦੋ ਮੈਚਾਂ ਵਿੱਚ 7-7 ਗੋਲ ਹੋਏ,25ਮਈ ਨੂੰ ਨਿਊਜ਼ੀਲੈਂਡ ਨੇ ਅਰਜਨਟੀਨਾ ਨੂੰ 5-2 ਨਾਲ,27 ਮਈ ਨੂੰ ਅਰਜਨਟੀਨਾ ਨੇ ਕੋਰੀਆ ਨੂੰ 4-3 ਨਾਲ ਸ਼ਿਕੱਸ਼ਤ ਦਿੱਤੀ । ਨਿਊਜ਼ੀਲੈਂਡ ਨੇ ਭਾਰਤ ਨੂੰ 25 ਮਈ ਵਾਲੇ ਦਿਨ ਵੱਧ ਸਕੋਰ ਅੰਤਰ 5-1 ਨਾਲ ਅਤੇ ਏਵੇਂ ਹੀ ਕੋਰੀਆ ਨੇ ਪਾਕਿਸਤਾਨ ਨੂੰ 28 ਮਈ ਦੇ ਦਿਨ  4-0 ਨਾਲ ਮਾਤ ਦਿੱਤੀ । ਕੋਈ ਵੀ ਮੈਚ ਗੋਲ ਰਹਿਤ ਬਰਾਬਰੀ ਉੱਤੇ ਨਹੀਂ ਰਿਹਾ । ਕਿਸੇ ਵੀ ਮੈਚ ਸਮੇ ਵਾਧੂ ਸਮਾਂ ਜਾਂ ਪਨੈਲਟੀ ਸਟਰੌਕਸ ਨਾਲ ਫ਼ੈਸਲਾ ਕਰਨ ਦੀ ਲੋੜ ਨਹੀਂ ਪਈ ।ਕੋਈ ਵੀ ਟੀਮ ਅਜੇਤੂ ਨਹੀਂ ਰਹੀ। ਕੋਈ ਵੀ ਲਾਲ ਕਾਰਡ ਨਹੀਂ ਵਰਤਿਆ ਗਿਆ ।

                            ਨਿਊਜ਼ੀਲੈਂਡ ਨੇ ਖੇਡੇ 7 ਮੈਚਾਂ ਵਿੱਚੋਂ 5 ਜਿਤਦਿਆਂ,2 ਹਾਰਦਿਆਂ 19 ਗੋਲ ਕੀਤੇ ਅਤੇ 8 ਗੋਲ ਕਰਵਾਏ ਫ਼ਾਈਨਲ ਵਿੱਚ ਅਰਜਨਟੀਨਾ ਨੂੰ 1-0 ਨਾਲ ਹਰਾਕੇ, 15 ਅੰਕ ਲੈਂਦਿਆਂ ਸੁਲਤਾਨ ਅਜ਼ਲਾਨ ਸ਼ਾਹ ਕੱਪ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰੀ ਸੁਲਤਾਨ ਕੱਪ ਦਾ ਸੁਲਤਾਨ ਅਖ਼ਵਾਕੇ ਖ਼ਿਤਾਬ ਜੇਤੂ ਵਜੋਂ ਨਾਅ ਦਰਜ ਕਰਵਾਇਆ ਹੈ ।ਇਸ ਤੋਂ ਪਹਿਲਾਂ1995,2003,2008,2009 ਵਿੱਚ ਸਿਰਫ਼ ਤੀਜਾ ਹੀ ਸਥਾਨ ਲਿਆ ਸੀ ।  ਦੂਜੀ ਵਾਰੀ ਫਾਈਨਲ ਵਿੱਚ ਪਹੁੰਚੇ ਅਰਜਨਟੀਨਾ ਨੇ ਖੇਡੇ 7 ਮੈਚਾਂ ਵਿੱਚੋਂ 4 ਜਿੱਤੇ,3 ਹਾਰੇ 17 ਗੋਲ ਕਰਵਾਏ,15 ਕੀਤੇ ,12 ਅੰਕ ਲੈ ਕੇ ਪਹਿਲੀ ਵਾਰੀ ਚਾਂਦੀ ਦਾ ਤਮਗਾ ਜਿੱਤਣ ਵਿੱਚ ਸਫ਼ਲ ਹੋਇਆ । ਅਰਜਨਟੀਨਾ ਇਸ ਤੋਂ ਪਹਿਲਾਂ 2008 ਦੇ ਫਾਈਨਲ ਵਿੱਚ ਭਾਰਤ ਨੂੰ ਹਰਾਕੇ ਖ਼ਿਤਾਬ ਜੇਤੂ ਅਖਵਾਇਆ ਸੀ । ਭਾਰਤ ਨੇ ਵੀ ਕੁੱਲ 7 ਮੈਚ ਹੀ ਖੇਡੇ,ਜਿੰਨ੍ਹਾਂ ਵਿੱਚੋਂ 4 ਜਿੱਤੇ,3 ਹਾਰੇ,15 ਗੋਲ ਕੀਤੇ ਅਤੇ 16 ਗੋਲ ਕਰਵਾਏ,ਮੁਕਾਬਲੇ ਚੋੰ ਬਰਤਾਨੀਆਂ ਨੂੰ 3-1 ਨਾਲ ਹਰਾ ਕੇ ਕਾਂਸੀ ਦਾ ਤਮਗਾ ਹਾਸਲ ਕਰਿਆ । ਬਰਤਾਨੀਆਂ ਨੇ ਖੇਡੇ 7 ਮੈਚਾਂ ਵਿੱਚੋਂ 3 ਜਿੱਤਾਂ,2 ਹਾਰਾਂ,2 ਬਰਾਬਰੀਆਂ ਦੀ ਮਦਦ ਨਾਲ 14 ਗੋਲ ਕੀਤੇ,ਏਨੇ ਹੀ ਕਰਵਾਏ,ਅਤੇ 11 ਅੰਕਾਂ ਦੀ ਮਦਦ ਨਾਲ ਚੌਥਾ ਸਥਾਨ ਹਾਸਲ ਕੀਤਾ । ਦੱਖਣੀ ਕੋਰੀਆ-ਮਲੇਸ਼ੀਆ ਵਾਲੇ ਮੈਚ ਵਿੱਚ ਦੱਖਣੀ ਕੋਰੀਆ ਦੀ ਟੀਮ ਨੇ 3-2 ਨਾਲ ਜਿੱਤ ਹਾਸਲ ਕਰਦਿਆਂ ਪੰਜਵਾਂ ਸਥਾਨ ਮੱਲਿਆ । ਖੇਡੇ 7 ਮੈਚਾਂ ਵਿੱਚੋੰ 3 ਜਿੱਤੇ,2 ਹਾਰੇ,ਦੋ ਬਰਾਬਰ ਰਖਦਿਆਂ,14 ਗੋਲ ਕੀਤੇ,10 ਗੋਲ ਕਰਵਾਏ ਅਤੇ 11 ਅੰਕ ਲਏ । ਛੇਵੇਂ ਸਥਾਨ ‘ਤੇ ਰਹੇ ਮੇਜ਼ਬਾਨ ਮਲੇਸ਼ੀਆ ਨੇ ਖੇਡੇ 7 ਮੈਚਾਂ ਵਿੱਚੋਂ ਇੱਕ ਜਿੱਤਿਆ, 4 ਹਾਰੇ ਅਤੇ ਦੋ ਬਰਾਬਰ ਰਖਦਿਆਂ 12 ਗੋਲ ਕੀਤੇ,17ਗੋਲ ਕਰਵਾਏ,ਅਤੇ 5 ਅੰਕ ਲਏ । ਪਾਕਿਸਤਾਨ ਨੇ ਸਿਰਫ਼ 3 ਅੰਕ ਲਏ,ਖੇਡੇ 6 ਮੈਚਾਂ ਵਿੱਚੋਂ 1 ਜਿੱਤਿਆ,5 ਹਾਰੇ,9 ਗੋਲ ਕੀਤੇ ਅਤੇ 16 ਗੋਲ ਕਰਵਾਏ,ਮੁਕਾਬਲੇ ਚੋੰ ਸੱਭ ਤੋਂ ਅਖ਼ੀਰਲਾ 7 ਵਾਂ ਸਥਾਨ ਹਾਸਲ ਕਰਿਆ । ਕੁੱਲ ਮਿਲਾਕੇ 24 ਮੈਚ ਖੇਡੇ ਗਏ, ਜਿੰਨ੍ਹਾਂ ਵਿੱਚ ਕੁੱਲ 98 ਗੋਲ ਹੋਏ ।    

                        5 ਸਪੈਸ਼ਲ ਐਵਾਰਡ ਵੀ ਦਿੱਤੇ ਗਏ ਕੈਲੇ ਪੌਂਟੀਫਿਕਸ ਗੋਲ ਕੀਪਰ (ਨਿਊਜ਼ੀਲੈਂਡ) ਦੀ ਫਾਈਨਲ ਮੈਚ ਸਮੇ ਬਿਹਤਰ ਕਾਰਗੁਜ਼ਾਰੀ ਲਈ ਮੈਨ ਆਫ਼ ਦਾ ਮੈਚ , ਟੂਰਨਾਮੈਂਟ ਦਾ ਸਰਵੋਤਮ ਖਿਡਾਰੀ ਖ਼ਿਤਾਬ ਭਾਰਤ ਦੇ ਉਪ-ਕਪਤਾਨ ਸਰਦਾਰ ਸਿੰਘ ਨੂੰ ਅਤੇ ਟੂਰਨਾਮੈਂਟ ਦਾ ਸਰਵੋਤਮ ਗੋਲ ਕੀਪਿੰਗ ਵਾਲਾ  ਖ਼ਿਤਾਬ ਨਿਊਜ਼ੀਲੈਂਡ ਦੇ ਕੈਲੇ ਪੌਂਟੀਫਿਕਸ ਦੀ ਝੋਲੀ ਪਿਆ । ਜਦੋਂ ਕਿ ਟਾਪਰ ਗੋਲ ਸਕੋਰਰ ਦਾ ਸਨਮਾਨ ਬਰਤਾਨੀਆਂ ਦੇ ਐਸਲੇ ਜੈਕਸਨ ਨੂੰ ਮਿਲਆ । ਫ਼ੇਅਰ ਪਲੇਅ ਟਰਾਫ਼ੀ ਬਰਤਾਨੀਆਂ ਦੇ ਹਿੱਸੇ ਰਹੀ।

                          ********************

ਰਣਜੀਤ ਸਿੰਘ ਪ੍ਰੀਤ

ਭਗਤਾ-151206 (ਬਠਿੰਡਾ)

ਮੁਬਾਇਲ ਸੰਪਰਕ;98157-07232